УИХ-ын гишүүн Б.Дэлгэрсайхан, иргэн Э.Цэрэндолгор нарын хооронд үүссэн маргаан эцэстээ шүүхээр шийдвэрлүүлэхдээ хүрээд байна. Үүнтэй холбоотойгоор гишүүн Б.Дэлгэрсайхан мэдэгдэл хийж “УИХ-д хоёр дахиа сонгогдоод үнэмлэхээ гардаж авсан хүндэтгэлтэй өдөр саарал зүйлийн талаар ярих гэж буйдаа харамсаж байна. Олон нийтийн сүлжээгээр хэдэн өдөр тавилттай жүжиг явлаа. Энэ жүжгийг иргэд ч гадарлаж байгаа байх. 2016 онд С.Баярцогтыг гишүүн байхад Туяацэцэг, “Цэнхэр үст” Цэрэн, Швейцарын иргэнтэй хамтран, ийм нөхдүүд зохион байгуулалттайгаар намнасан. Яг тэр жүжгийг над дээр хийж байна. Үүний ард өмнөх парламентад надтай сууж байсан залуу улстөрч бий. С.Баярцогтыг асуудал дээр ч тэр санхүүжүүлсэн. Өнөөдөр бас над дээр ингэж байна. Мөн хууль, хяналтын байгууллагын удирдлагад байсан хүмүүсийн оролцоо бий. Би бүгдийг нь мэднэ.

Намайг С.Баярцогтод хахууль өгсөн гэх яриа ч гарсан. Би 2004 онд уул уурхайн бизнест орсон. Тэр үед С.Баярцогт хэн ч биш байсан, гудамжинд явж байсан. Та нар мэдэж байгаа. Ямар хэрэгтэй гэж би тэр хүнтэй холбогдох юм бэ.

Би Баярцогтод 8.2 сая ам.доллар зээлүүлсэн нь үнэн. Баярцогт хагас жилийн дараа буцааж өгсөн нь үнэн. Үүнийг мэдсээр байж зориуд мушгин гуйвуулж байгаад гайхаж байна. Тийм учраас Швейцарын сэтгүүлчийг Швейцарын шүүхэд, намайг бүтэн 3-4 өдөр тавилттай жүжгээр лайв хийсэн “Цэнхэр үст” Цэрэндолгор гэдэг бүсгүйг хуулийн байгууллагад шалгуулахаар өгснөө мэдэгдье” гэсэн байдаг.

Б.Дэлгэрсайхан гишүүний энэхүү мэдэгдэлд “Цэнхэр үст” Цэрэн хариу тайлбарыг өгсөн ч эцсийн шийдвэрийг шүүхээс дэнслэх учиртай. Харин Б.Дэлгэрсайхан, Э.Цэрэндолгор нарын маргаантай асуудлаас нэгэн асуулт урган гараад байна.

Тэр нь С.Баярцогт, Б.Дэлгэрсайхан нарыг хуулийн байгууллагад матсан залуу улстөрч хэн бэ?

Өөрийнх нь хэлж, тайлбарласнаар уг улстөрч өмнөх парламентад Б.Дэлгэрсайхантай тохой нийлүүлэн сууж байсан гэх. Өмнөх парламентын үед шинээр сонгогдсон гишүүдийн ес нь 40 хүртэлх насны буюу залуудаа тооцогдох хэмжээнийх байв. Үүнээс хамгийн залуу нь бүрэн эрхээ дуусгаж чадалгүй чөлөөлөгдсөн Д.Гантулга 30 настай байсан юм. Тэгэхээр гишүүн Б.Дэлгэрсайханы хэлсэн үг үнэн бол өмнөх парламентад гишүүнээр ажилласан тэдгээр гишүүний нэг нь түүнийг матсан байж таарах нь. Харин хэн бэ? "Цэнхэр үст" Цэрэн нарыг санхүүжүүлж, нэр бүхий улстөрчдийг намнадаг улстөрч нь хэн байв? гэдэг нь асуулт хэвээр үлдэж байна.

С.Сүлд