Нийслэлийн Засаг дарга бөгөөд Улаанбаатар хотын захирагч  С.Амарсайхан УИХ-ын ээлжит сонгуульд нэр дэвшиж ялалт байгуулсан билээ. Тэрбээр өчигдөр буюу өнгөрсөн зургадугаар сарын 30-нд УИХ-ын гишүүний бүрэн эрхийн тангарагаа өргөснөөр хотын даргаар хэн тодрох бол гэсэн асуулт урган гарч ирээд буй.

Тэгвэл Монгол Улсын Ерөнхий сайд У.Хүрэлсүх захирамж гаргаж, хотын дарга С.Амарсайханыг үүрэгт ажлаас нь чөлөөлж, түр орлон гүйцэтгэгчээр Хөгжлийн бодлогын асуудал хариуцсан Нийслэлийн Засаг даргын нэгдүгээр орлогч Ж.Батбаясгаланг томилсон байна.

Энэ дагуу хотын дарга асан С.Амарсайхан тамгаа Ж.Батбаясгаланд хүлээлгэн өглөө. Тэрбээр “Энэ бол зөвхөн тамга бус, бодлогын баримт бичиг юм. Төрийн ажил ил тод, нээлттэй байх ёстой. Ямар ажлыг цааш үргэлжлүүлж, хэрхэн хийх нь нээлттэй байх ёстой учраас төрийн тамга, тэмдэгтэй хамт Алсын хараа-2050 бодлогын баримт бичиг, Улаанбаатар хотын хэтийн зорилго, стратеги төлөвлөгөө, Улаанбаатар хотын мастер төлөвлөгөө зэргийг хамт хүлээлгэн өгч байна” гэлээ.

Нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан нь Эрх зүйч мэргэжилтэй. 2016 онд Баянгол дүүргээс НИТХ-д сонгогдсон, улмаар Нийслэлийн засаг даргын агаарын бохирдол, ногоон хөгжил хариуцсан орлогчоор ажиллаж байгаад 2019 оны хоёрдугаар сараас С.Амарсайханы багт нэгдүгээр орлогчоор ажиллаж буй юм.

Г.Маргад