УИХ-ын дарга, Бүлгийн дарга нарыг сонгож, томилсон Анхдугаар чуулганы хуралдаанаар Байнгын хорооны бүрэлдэхүүнийг баталлаа. Одоо Байнгын хороод анхны хуралдаанаа хийж, даргаа сонгосноор УИХ-аар хэлэлцэж, батламжлах юм. Үүнээс гадна УИХ-ын Дэд хороодын дарга нарыг томилох учиртай.

Тэдгээрээс УИХ-ын гишүүний бүрэн эрхийг түдгэлзүүлэх эсэх асуудлыг хэлэлцдэг Дэд хороо нь Халдашгүй байдал.

2016-2020 оны парламентад тус хороог Хууль зүй, дотоод хэргийн сайд Ц.Нямдорж даргалж, Шадар сайд Ө.Энхтүвшин, Хөдөө, аж ахуй, хөнгөн үйлдвэрийн сайд Ч.Улаан, Батлан хамгаалахын сайд Н.Энхболд, УИХ-ын гишүүн асан Д.Лүндээжанцан нар бүрэлдэхүүнд нь багтдаг байсан юм. Харин энэ удаад уг Дэд хороог Батлан хамгаалахын сайд Н.Энхболд даргалах бололтой.

Түүний хувьд энэ удаагийн парламентад хамгийн их буюу зургаа дахь удаагаа сонгогдон ажиллахаар болоод байгаа юм.

Түүнтэй хамт Дэд хорооны бүрэлдэхүүнд Сү.Батболд, Б.Бат-Эрдэнэ нар багтах нь. Эдгээр гишүүний хувьд УИХ-д таван удаа сонгогдоод буй. Харин үлдсэн хоёр гишүүн нь хэн байх эсэх нь парламентын эрх мэдлийн асуудал болж байна. Өдгөө УИХ-д дөрвөн удаа сонгогдсон Н.Алтанхуяг, Ц.Мөнх-Оргил, Ч.Хүрэлбаатар, Б.Чойжилсүрэн, С.Бямбацогт, Г.Занданшатар, У.Хүрэлсүх, Ц.Даваасүрэн нарын найман гишүүн ажиллаж байгаа юм.

Хуульд зааснаар Халдашгүй байдлын дэд хороо нь хамгийн олон удаа сонгогдсон таван гишүүнээс бүрддэг.

УИХ-ыг хугацаанаас нь өмнө тараах, гишүүний бүрэн эрхийг түдгэлзүүлэх, эгүүлэн татах талаар эрх бүхий байгууллага, албан тушаалтнаас УИХ-д ирүүлсэн саналыг судалж санал, дүгнэлт гаргаж, зохих Байнгын хорооны болон нэгдсэн хуралдаанд оруулдаг.

Г.Эрхэс