УИХ-ын эмэгтэй төлөөлөл танаа. Та бүгдэд дайх хэдхэн үг байна. Харгислалын шүүс болсон балчир үрс эрхэлж, наадах ёстой тэр л бяцхан ертөнцөө тэврээд үдэж буй хүүхдүүддээ нэг анхаараарай. Хайхрамжгүй эцгийнх нь оронд хөх тэнгэр эцэг нь болж, энэрэлгүй ээжийнх нь орон зайг сэвшээ салхи орлож байх вий.

Тиймээс л ээжийнх нь оронд ээж нь болж, түмэн үрсээ энэрч, тэнхээ нь дутсан бүсгүйчүүдээ хамгаалаарай гэж та бүхнээс гуйя.

Ард түмэн та бүхнээс ийм л зүйл гуйж, бас хүсэж байна.

Ганцхан жишээ... Энэ оны эхний гурван сарын байдлаар гэр бүлийн хүчирхийллийн улмаас үйлдэгдсэн 279 гэмт хэрэг бүртгэгджээ. Үүнээс 43 нь хүүхдийн хүчирхийлэл. Гэмт хэргийн 50 орчим хувь нь согтуугаар үйлдэгдсэн бөгөөд хохирогч нар ихэвчлэн зодуулж, биедээ хүнд гэмтэл авсан байдаг гэж Гэр бүлийн хүчирхийлэлтэй тэмцэх хэлтсийн дарга, цагдаагийн хошууч Э.Баярбаясгалан онцолсон.

Энэ бол зөвхөн цагдаагийн байгууллагад бүртгэгдсэн тоон мэдээлэл. Харин хаалганы цаана хэдэн хүүхэд, эмэгтэйчүүд аврал нэхэж суугаа бол. Гэр бүлийн хүчирхийллийн эсрэг хатуу зогсож, зарчимч байгаасай гэж хүснэ. Нэгдүгээр дайх зүйл энэ.

Хүүхэд нас гэдэг юмсыг анхлан таних мэдэх үеэс эхлээд өдөржин шөнөжин найзуудтай хөгжилдөж, тоглох юмсан гэсэн чин хүсэл өвөртлөн байдаг үе. Гэвч хүүхдүүд минь тоглох талбайгүй болжээ. Тоглох тоглоомын талбай дээр нь автомашины багшрилдаж эвсэл өндөр барилгууд сүндэрлэж. Байгаа нэг нь эрсдэлтэй, бүр амь насанд халтай. Тиймээс хүүхдүүдээ аюулгүй орчинд тоглож, наадах талбайтай болгох нь хоёрдугаар асуудал.

Тоглох хүслээ барьж дийлээгүй бяцхан үрс тогтоол усанд амиа алдсан хэрэг хэдхэн хоногийн өмнөхөн болсон. Бид шуурсан, бид орилсон. Гэвч хэн ч гараад тэмцээгүй, сонгуулийн чимээнээр хэрэг намжсан.

Тогонд цохиулж, хүнд төмрөнд даруулж, бүр ухаан ороогүй бяцхан хүү амиа хорлох гэсэн эхийнхээ сонголтыг эсэргүүцэж чадалгүй хамтдаа амиа алдсан. Энэ бол бидний эргэн тойронд, нүдний өмнө ил болж буй хэргүүд.

Энэ үед өмнөх парламентын эмэгтэй гишүүдийн төлөөлөл юу дуугарав. Бяцхан амийг хэнээс нэхэв. Хэн ч нэхээгүй, тэд улс төрийн амбицаа хөөсөн үү гэхээс, ард түмний хүүхдийн төлөө гарч ирээд уйлсан, хашгирсан нь бүр тэмцсэн нь нэгээхэн үгүй.

Парламентад сонгогдсон эмэгтэй гишүүдээс ард түмэн цөөхөн зүйл хүсдэг. Тэр нь энэ бүхэн.

Охид эмэгтэйчүүдээ, хүүхэд, залуусаа хайрлаасай, хамгаалаасай гэж хүсдэг, гуйдаг, бас шаарддаг. Тиймээс л өмнөх парламентын эмэгтэй гишүүдийн хийж чадаагүйг, амжуулж чадаагүйг амжуулж, гүйцээж чадаагүйг нь дуусгаж, үлгэр жишээ байхыг хүсье. Ард түмэн та бүхнээс үүнийг л хүсэж байна.

Б.Лхам