УИХ-ын Анхдугаар чуулганаар Халдашгүй байдлын дэд хорооны бүрэлдэхүүнийг хэлэлцэж байна. Уг хорооны бүрэлдэхүүнд УИХ-ын гишүүн Н.Энхболд, Б.Бат-Эрдэнэ, С.Батболд, Ц.Мөнх-Оргил, С.Бямбацогт нар багтаж байгаа юм. Энэ үеэр Ж.Сүхбаатар “Сануулж, анхааруулж хэлэх зүйл байна. Өнгөрсөн парламентад болсон сургамж байна. Шударга ёсыг энэ танхимаас тогтоох ёстой гэж ярьж байгаа. Халдашгүй байдлын хороо тухайн гишүүний хувийн асуудлыг хамгаалдаг газар биш. Хамгийн гол нь, шударга ёсны үйл явцаа зөв болгох хэрэгтэй. Ард түмний зүгээс УИХ-ын гишүүн халдашгүй эрхтэй байх ёстой гэж үзэхгүй байгаа” гэсэн бол С.Ганбаатар “Энэ хороонд “Та бидний эвсэл”-ээс хүн оруулах ёстой. Заавал төлөөлөл байх ёстой” гэв.

Хариуд нь УИХ-ын дарга Г.Занданшатар “УИХ баталсан хуулиа дагана. Гэхдээ УИХ-ын гишүүд хууль санаачлах эрхтэй. Энэ асуудлаар Бүлгийн дарга нар хэлэлцээд явах боломжтой” гэлээ.

Хуульд зааснаар УИХ-ын Халдашгүй байдлын дэд хороонд хамгийн олон удаа сонгогдсон таван гишүүнийг сонгодог.