Ерөнхий сайд У.Хүрэлсүхийг улираан томилох эсэхийг хэлэлцэж, шийдвэрлэсэн УИХ-ын Анхдугаар чуулганаар Халдашгүй байдлын дэд хороо байгуулах, бүрэлдэхүүнийг батлах тогтоолын хэлэлцлээ. Төрийн байгуулалтын байнгын хорооноос Халдашгүй байдлын дэд хороонд УИХ-ын гишүүн Н.Энхболд, С.Батболд, Б.Бат-Эрдэнэ, Ц.Мөнх-Оргил, С.Бямбацогт нарын бүрэлдэхүүнтэй байгуулах нь зүйтэй гэж үзсэнийг хэлэлцэж баталсан юм. Уг асуудлыг хэлэлцэх үеэр гишүүн С.Ганбаатарын зүгээс цөөнхийн төлөөллөөс оруулах ёстой гэсэн байр суурийг илэрхийлэв.

Уг асуултад гишүүн Н.Энхболд "Энэ бол хувь хүмүүсийн тухай асуудал биш. УИХ гэдэг төрийн эрх барих дээд байгууллага, үйл ажиллагаагаа хараат бусаар явуулах нөхцөлийг нь гишүүдээр нь дамжуулж явуулж байгаа хэлбэр. Олон улсын бүх парламентад байдаг бүтэц. Гэхдээ энэ бол хэрэг хийсэн, асуудалд холбогдсон хүмүүсийг хамгаалдаг бүтэц гэж ойлгож болохгүй. Тэр тусмаа Үндсэн хуульд оруулсан нэмэлт, өөрчлөлтөөр УИХ-ын гишүүн Үндсэн хууль, өргөсөн тангаргаа зөрчвөл тэр гишүүнийг эргүүлж татах, огцруулах боломж бүрдсэн. Үндсэн хуулийн нэмэлт, өөрчлөлтийн дагуу 40 гаруй хуульд өөрчлөлт оруулах ёстой. Үүн дээр УИХ анхаарал хандуулж, Халдашгүй байдлын дэд хороотой хамтарч ажиллах хэрэгтэй.

Гишүүнийг ямар тохиолдолд эргүүлэн татах вэ гэдгийг холбогдох хуулиудад нарийвчилж тусгах ёстой. Хууль нь ийм байгаа учраас энэ парламентад хамгийн их сонгогдсон гишүүдийг дэмжээд оруулж ирсэн байна. Н.Алтанхуяг гишүүнтэй уулзсан. “Өөр дэд хороонд орсон байгаа учраас Халдашгүй байдлын дэд хороонд орох боломжгүй байна” гэсэн. Тиймээс хуулийн дагуу эдгээр таван хүний бүрэлдэхүүнтэй орж ирж байгаа. Халдашгүй байдлын дэд хорооны асуудал олонхи, цөөнхтэй огт хамаагүй. Тухайн гишүүнтэй л холбоотой асуудлыг л ярина" гэсэн юм.

С.Сүлд