Төрийн байгуулалтын байнгын хорооноос ирүүлсэн санал, дүгнэлтийн дагуу Халдашгүй байдлын дэд хорооны бүрэлдэхүүнийг УИХ-ын чуулганы нэгдсэн хуралдаанаар хэлэлцэж баталлаа.

Энэ үеэр УИХ-ын гишүүн Ш.Раднаасэд "Ж.Эрдэнэбат гишүүний асуудлыг Халдашгүй байдлын дэд хороо яаж хэлэлцэх юм. Орж ирсэн материал байгаа юм уу. Нэг гишүүний асуудал биш, Их хурлын дархлааны асуудал шүү. Байгаль орчин, хүнс хөдөө аж ахуйн байнгын хороонд уул уурхайн лицензтэй хүмүүс орчихоод ямар нэгэн байдлаар өөртөө ашигтайгаар кноп дарсан бол татагдана. Энэ мэт Үндсэн хуультай холбоотой өөрчлөлтийг гишүүдэд сайн ойлгуулж өгөхгүй бол болохгүй. Халдашгүй байдлын дэд хорооны таван хүн өдөр, шөнөгүй ажиллана. Цэц гэдэг УИХ-ын гишүүдийн шүүх боллоо гэдгийг батлагдаж байхад нь хэлж байсан. Жижиг, сажиг гэлтгүй хууль зөрчсөн бүх асуудал дээр чинь татах асуудал яригдана. Байгаль орчин, хүнс хөдөө аж ахуйн байнгын хороонд хэдэн лицензтэй хүн байгаа бол. Энэ хүмүүс Ашигт малтмалын хууль хэлэлцэхэд орохгүй бол хэргээс мултарна. Орлоо гэвэл чиний буруу болгоод зөв үү, буруу юу гэдэг маргаан эх захгүй явна. Энэ мэт зөрчилтэй юмнууд их гарна. Ж.Эрдэнэбат гишүүний асуудлыг яаралтай хэлэлцэх ёстой. Гэхдээ бичиг ирээгүй байхад Их хурлаа өөрөө хэлэлцэх боломжгүй. Бичгээ өг гэж шаардах юм уу. Үүнийг нэг талдаа гаргахгүй бол болохгүй болохгүй" гэв.

С.Сүлд