“Би уйлвал дүү нар минь уйлна. Тиймээс хатуужилтай байж, дүү нараа зоригжуулах ёстой” гэж хэлэх ах. Аав нь хүний нутагт, сэхээн амьдруулах тасагт ухаангүй 20 гаруй хонож буй бол ээж нь аавыг нь хөл дээр нь босгохоор араас нь явсан. Энэ хооронд зургаан алаг үрс нь аавынхаа эмчилгээний зардал болох 200 сая төгрөгийг босгохоор өдөр, шөнөгүй бууз, баншны цехэд ажиллаж байна.

Зургаан хүүхдийн гурван бага нь 6-11 насны охид. Тэд аавынхаа байгуулсан цехэд сонгино арилгах, бууз, банш өрөхөөс эхлээд цэвэрлэгээ хийх зэргээр өөрсдийн хийж чадах бүхнээ жижигхэн хурууныхаа өндгийг цэврүүттэл хийж байна.

Харин гурван ах нь бууз, баншаа хийх, борлуулах зэрэг үндсэн ажлаа хийдэг. Угтаа бол тэд сургууль, цэцэрлэгтээ явж, бусад хүүхдийн л адил сурч боловсрохдоо анхаардаг хүүхдүүд байв. Гэтэл аав нь өнгөрсөн хоёрдугаар сард өөрийн байгуулсан буузны цехээ өргөж, тоног төхөөрөмжөө шинэчлэхээр Солонгос улсын зорьсон ч, коронавирусний улмаас хөл хорионд оржээ.

Аав Р.Самбаллхүндэв нь хөл хорионд орлоо гээд зүгээр суусангүй. Айл нүүлгэх, цэвэрлэгээ хийх зэргээр аль олдсон бүхнийг хийж, ар гэртээ дэм болдог байж. Гэтэл зургадугаар сарын эхээр гэнэт ухаан алдан унажээ. Энэ үед хамт байсан айлынх нь хүмүүс түргэн дуудаж үзүүлэхэд коронавирусний халдвараас болоогүй байна. Харин тархинд нь цус харвасан, биеийн байдал маш хүнд, амиа алдах эрсдэлтэй гэжээ. Ингээд гурван удаагийн хүнд мэс засал хийж, амь насыг нь аварсан ч ухаан орохгүй байсаар 20 гаруй хонов. Энэ хооронд эхнэр Б.Ундраа нь гэр бүл, найз нөхдөөсөө тусламж хүссэний хүчинд 40 сая төгрөг босгожээ. Ингээд УОК-т хандаж БНСУ-ыг зорих болсон шалтгаанаа хэлсэн байна.

Гэтэл гурван сарын хугацаанд Монголд эргэн ирэхгүй гэсэн гарын үсэг зурвал, тусгай үүргийн онгоцоор Солонгос явж болно гэж. Эр нөхрийнх нь амь нас дээсэн дөрөөн дээр дэнжигнэж байхад гарын үсэг зурах юу ч биш санагдах нь дамжиггүй.

Солонгос улсыг зорих болтол коронавирусний халдваргүйг батлатал 14 хоног тусгаарлалтад байх ёстой. Төлбөр 1.4 сая вонн тушаа гэж. Гэргий Б.Ундармаа арай хийж цуглуулсан мөнгөнөөс нь харамлан байж тусгаарлалтын мөнгөө тушааж, өнөөдөр тусгаарлалтаас гарч, эр нөхөр дээрээ очиж, халуун гарыг нь атгаж байна.

Гэвч эмчилгээний төлбөр хаанаа ч хүрэхгүй. Учир нь хандиваар бас өөрийн гэсэн юмаа зарж, борлуулан босгосон 40 сая төгрөгөөсөө 1.4 сая воныг тусгааралтын төлбөрт төлсөн. Гэтэл цаана нь дахиад 200 төгрөг шаардлагатай. Хэрвээ ийм хэмжээний мөнгө зарж, эмчилгээ хийхгүй бол амьд үлдэж чадсан ч хүний гарт орох эрсдэлтэй.

Тиймээс л ард нь үлдсэн зургаан хүүхэд нь бууз, банш хийж эмчилгээний 200 сая төгрөгийн зардал олохоор хичээж байна.

Тэдний хамгийн бага дүү нь Мөнхжин гэдэг. “Би удахгүй долоо хүрнэ. Аав, ээжийг гэртээ ирэх үед би гэрээ цэвэрлээд бас сонгино арилгаад сурчихсан байна” гэсэн бол найман настай эгч нь “Сонгино арилгахаар нүднээс нулимс гараад жаахан хэцүү. Гэхдээ зүгээрээ. Аав, ээж минь заавал гэртээ ирнэ. Тэр болтол бид хичээнэ” гэж цовоо хариулсан.

Тэд хайртай аавынхаа эмчилгээний зардлыг олохоор ийн хичээж байна. Тэд хүнээс бэлэн мөнгө гуйгаагүй, харин өөрсдийн гарын амталж, хийсэн бууз, банш, хэрчсэн гурил, бөөрөнхий махыг худалдаж авахыг хүссэн юм.

Би ТОМ ах

Таван дүүгээ асрахын сацуу цехээ удирдаж буй залууг Тулуй гэдэг. Хятадад сургуульд төгссөн, шаггүй сайн сурлагтан. Түүн шиг ээ, сайн ах, сайн хүү байхын төлөө хичээдэг гэдгээ хэлсэн юм.

-Таны аав өмнө нь хууч өвчтэй байсан юм уу?

-Цоо эрүүл биетэй хүн байсан. Бидэнд санаа зовоод бас, Солонгосын халуун агаар, дээр нь хоол унд тааруу явсан байх. Гэнэт л ухаан алдаж унасан гэсэн. Эмч ирээд харвасан байна гээд гурван удаа хагалгаа хийсэн. Гэсэн ч ухаан ороогүй. Ээж араас нь явсан учир би дүү нараа харж үлдсэн дээ.

-Аав, ээжийн орон зай эзгүйрэхээр сэтгэл хоосордог. Гурван дүү чинь нялхаараа байна. Магадгүй ээж, аавыгаа нэхэж, уйлахаас эхлээд санаж, бэтгэрч байгаа нь лавтай. Энэ үед дүү нараа яаж зоригжуулж урамшуулдаг вэ?

-Миний дүү нар инээж явбал аав нь баярлана. Аавыгаа баярлуулахын тулд инээж яваарай гэж хэлдэг. Үнэндээ уйлахаар нь дагаж уйлчих гээд хэцүү байдаг. Гэхдээ уйллаа гээд асуудал шийдэгдэхгүй. Харин тэрнийхээ оронд бууз, баншаа хийж, зараад байвал ядаж өдрийн эмчилгээнийх нь төлбөрийг олоод байна шүү дээ. Тиймээс л ажлынхаа хажуугаар дүү нартайгаа хамт ажиллаж байна.

Зургаан хүүхдийнхээ төлөө бууз, баншны цех ажиллуулж байсан Р.Самбаллхүндэв амьдралаа босгохын тулд Хятад, Орос гээд цөөнгүй улсад наймаа хийж иржээ.

Үүнийхээ үр шимэнд “Сумо” цехээ байгуулж, эхний бүтээгдэхүүнээ үйлдвэрлэж эхэлж. Ингээд тоног төхөөрөмжөө сайжруулахаар Солонгост очсны дараа ийм зүйл тохиолдсон юм.

“Сумо” нэрийн бүтээгдэхүүнийг ээж Б.Ундараагийг жороор амталж, технологийн стандартаар үйлдвэрлэдэг. Энэ ч утгаараа хэрэглэгчид ам сайтай байдаг юм билээ.

Тиймээс та дээрх зургаан хүүхдэд туслахыг хүсвэл тус нэрийн бүтээгдэхүүнээс худалдан авалт хийхэд л болох юм билээ.

Үүнийгээ ч тэд хэлсэн. Тэд аав нь, ээж нь гэртээ хүрээд ирвэл хоосон хоносон ч хамаагүй. Хамгийн гол нь элэг бүтэн байвал аз жаргалтай байж чадна гэж хэлсэн.

Тиймээс л та бүхэн энэ зургаан хүүхэд туслая гэвэл, “Сумо” нэрийн бүтээгдэхүүнээс худалдан авалт хийгээрэй. Бас сэтгэлийн дэм хайрлахыг хүсвэл, 91009901 дугаарын утсаар холбогдож болно шүү.

Түүнчлэн аавынх нь эмчилгээнд бага ч гэсэн дэмжлэг үзүүлэхийг хүсвэл, ХААН БАНК-Б.УНДРАА-5034021221 тоот дансанд сэтгэлийн хандиваа өгөөрэй. 

Г.Нацаг