Өчигдөр БНСУ-ын тусгай үүргийн хоёр нислэгээр 420 хүн, АНУ-аас 25, Замын-Үүд хилийн боомтоор 96 хүн ирсэн. Эдгээрээс ХӨСҮТ-д 9, Цэргийн төв эмнэлэгт 25 хүн, үлдсэнийг тусгаарлах байранд байрлуулжээ.

Ингээд дэлхийн бусад улсуудад халдварын тохиолдол ямар байгаа талаар ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа мэдээлэл өглөө.

Тэрбээр “Энэ сарын 2-нд АНУ-д  шинээр 54.3 гаруй мянган хүн халдварлаж, 725 нас барж нийт тохиолдол 2.679.000 боллоо. Үүнээс 128 мянган хүн эндээд байна. Халдвар хүн амын дунд өргөн хүрээнд тархаж байгаатай холбогдуулан 23 мужид үйлчилгээний байгууллагыг нээх шийдвэрийг хойшлуулаад байна. Мөн олон нийтийн газар амны хаалт зүүхийг шаардаж эхэлжээ.

Номхон далайн баруун бүсийн орон Японд өчигдөр 125 тохиолдол, нэг нас баралт бүртгэгдлээ. Батлагдсан тохиолдлын 107 нь Токио хотод гарчээ. Халдвар авсан иргэдийн дийлэнх нь 20-30 насны залуучууд байгаа бөгөөд шөнийн клубуудээр үйлчлүүлсэн иргэд байжээ. Харин БНСУ-д шинээр 63 тохиолдол нэмэгдсэн. Халдвар авсан хүний эмчилгээний зардлыг төрөөс дааж байгаа юм байна.

БНХАУ-д таван шинэ тохиолдол нэмж бүртгэгдсэнээс гурав нь гадаад улсын иргэн байна” гэлээ.

А.Сүх