Нийслэлийн засаг даргын орлогч, Зам тээврийн асуудал хариуцсан төслүүдийн удирдагч Б.Отгонсүхээс авто замын ажил болон дүүжин замын ажлын талаар тодрууллаа.

-Замын түгжрэлийг бууруулах зорилгоор дүүжин замын тээвэр байгуулахаар болсон. Ажлын явц ямар шатандаа явж байна вэ?

-Улаанбаатар хот газар зүйн байрлалын хувьд дөрвөн уулын дунд байрладаг. Мөн уулын Баянхошуу, Дэнжийн 1000, Хайлааст зэрэг уулын орой дээр амьдарч байгаа иргэдээ цэцэрлэг сургуульд нь хүргэхийн тулд энэ төслөө хэрэгжүүлж байгаа. Хэдий цар тахлын халдвартай үе ч гэсэн хөрөнгө оруулалт, бүтээн байгуулалтын бэлтгэл ажлаа хангаад явж байна.

-Нийтийн тээвэрт хийгдэхээр төлөвлөгдсөн ямар ямар төсөл хөтөлбөрүүд байна вэ?

-Улаанбаатар хотын замын түгжрэлийг бууруулах ажлын хэсэг гэж бий. Ажлын хэсэг замын түгжрэлийг шийдэх урт, дунд хугацааны төлөвлөгөө боловсруулсан. Төлөвлөгөөгөөр замын түгжрэлийг 2025 он гэхэд 50 хувь бууруулах зорилт тавьсан. Үүний нэг нь нийтийн тээврийн парк шинэчлэлт юм. Нийтийн тээвэрт 2009 оноос хойш томоохон парк шинэчлэл хийгдээгүй. Энэ хүрээнд эхний автобуснууд орж ирж байна. Энэ жил 300 автобус оруулж ирнэ гэж төлөвлөсөн.

Мөн 200 хүүхдийн автобусыг үйлчилгээнд гаргана. Уг автобус энэ сард багтан орж ирнэ. Нийслэлийн хэмжээнд 292 мянган ерөнхий боловсролын сургуулийн сурагчид бий. Улмаар ирэх хичээлийн жилд хүүхдийн автобусаа үйлчилгээнд гаргах юм.

-Автозамын засварын ажил ямар шатандаа явж байна вэ?

-Нийслэлийн хэмжээнд улс, нийслэлийн хөрөнгөөр 50.2 км асфальтан зам тавихаар төлөвлөсөн. Энэ жилийн төсвийн хөрөнгийн нэлээд хувийг гэр хороолол болон захын дүүргүүд рүү тавихаар төлөвлөсний дагуу замын ажлууд дөрөвдүгээр сарын 1-ээс эхэлсэн. Мөн 50.2 км дугуйн замын ажил үргэлжилж байна.

А.Сүх