Эрүүл мэндийн яамнаас коронавирусний нөхцөл байдлын талаар ээлжит мэдээллээ хийлээ.

ЭМЯ-ны Гадаад харилцаа хамтын ажиллагааны хэлтсийн дарга Б.Янжмаа "Дэлхийн хэмжээнд халдварын тоо 11 сая гаруйд хүрсэн. Үүнээс 5.7 сая хүн эдгэрч, 523 мянган хүн эндсэн байна.

Бразил улсад сүүлийн 24 цагийн хугацаанд 42.2 мянган шинэ тохиолдол нэмэгдлээ. Тус улсын зарим хотод баар цэнгээний газрыг нээсэн бөгөөд амны хаалт зүүхийг зөвлөжээ. Япон улсад халдвар авч байгаа иргэдийн дийлэнх нь 20-30 насны залуучууд байна. Мөн халдвартай иргэдийн гуравны нэгийг хаанаас халдвар авсныг нь мэдэхгүй байгаа нь эрсдэл үүсгэж байна гэжээ. 

БНСУ-д 63 тохиолдол шинээр илэрсэн. Үүнээс 23 нь гадаад улсаас зөөвөрлөгдөн иржээ. Харин БНХАУ-д шинээр гурван тохиолдол илэрсэн. Бээжин хотын хүсний захад гарсан халдварын тоо 332 болсон. Үүнээс ес нь бүрэн эдгэрээд байна" гэлээ. 

А.Сүх