УИХ-ын сонгуулийн үр дүнгээр АН өмнөх “амжилт”-аа ахиулан биелүүлж хоёр суудлаар бүл нэмсэн. Өөрөөр хэлбэл, 2016-2020 оны парламентад есөн суудлыг авч 2020 оны ээлжит сонгуулийг долоон гишүүнтэй угтсан АН УИХ-д 11 төлөөлөлтэй болж, тангараг өргөсөн нь өнгөрсөн долоо хоногийн үйл явдал. Нийт гишүүдийнхээ саналаар сонгогдож, Намынхаа “Үндсэн хууль”-ийг шинэчилсэн С.Эрдэнэ сонгуулийн үр дүнг хүлээн зөвшөөрч, албан тушаалаасаа огцорч буйгаа мэдэгдсэн. Үүнтэй холбоотойгоор АН-ын дараагийн дарга хэн байх вэ? гэсэн асуулт бүхий марафон тус намд өрнөж эхлээд багагүй хугацаа өнгөрч байна.

УИХ-ын гишүүн асан Ц.Оюунгэрэл Намын даргад ил тод нэрээ дэвшүүлснийг эс тооцвол одоогоор С.Эрдэнээс тамга гардах кандитат хараахан тодроогүй л байна.

Ил гарч дуугарсан нь Ц.Оюунгэрэл болохоос хөшигний ард хэнийгээ дарга болгохоо экс удирдлагууд нь хэдийнэ тохирч эхэлсэн нь дамжиггүй. Үүнийг баталсан гэлтэй АН-ын дарга асан тэргүүтэй удирдлагууд хэвлэлийн бага хурал зарлаж, Намынхаа Их хурлыг хуралдуулахаар болсон тухайгаа мэдэгдэв. Нэгэн цагт тус намын толгой явсан ч өдгөө шороотой бөхөөр нэрлэгдэх болсон С.Эрдэнэ энэ тухай “УИХ-ын найм дахь удаагийн сонгуулийн үр дүнгээр шинэ парламент бүтэц бүрэлдэхүүнээ томилж эхэлж байна. Гэхдээ 2020 оны УИХ-ын үр дүнгийн маргаан дуусаагүй байгаа.

Энэ сонгуулир хууль зөрчсөн байх эсэх асуудлыг улс төрийн намууд хамтарч тогтоолгох тал дээр ажиллаж байгаа. Цаашид ч гэсэн энэ ажил үргэлжлэх байх.

АН өнөөдөр улс төрийн хариуцлагатай хүчний хувьд улс төрийн тогтвортой байдлыг эрхэмлэж аливаа асуудалд хүндэтгэлтэй хандаж байгаа. АН дотоод үндсэн дүрэмтэй. Уг дүрмийнхээ хүрээнд үйл ажиллагаа явуулж байгаа улс төрийн нам. Гэхдээ өнөөдөр үндсэн дүрмийн бус аливаа үйл ажиллагааг бид хүлээн зөвшөөрөхгүй. АН-ын даргаар ажиллаж байсан хүний хувьд АН-ын үндсэн дүрмийн хүрээндээ холбогдох байгууллагууд шийдвэрээ гаргаж үйл ажиллагаагаа зохион байгуулж байна.

Үндсэн дүрмийнхээ дагуу намын Их хурлыг зарлан хуралдуулах ёстой. Намын даргын бүрэн эрхэнд бий. Тиймээс долдугаар сарын 02-ны өдөр тушаалаа гаргасан. Тушаалд намын 10 дугаар Их хурлыг наймдугаар сарын 23-ны өдөр  зарлан хуралдуулах тушаал гаргасан.

Мөн Ардчилсан намын Үндсэн дүрмийн албан ёсны тогтоол гарсан. Үүнтэй холбоотойгоор дарааагийн нөхцөл байдал бол шинэ намын даргыг сонгох, шинэ намын даргын дотоод сунгааг явуулах ёстой” гэв.

Экс дарга С.Эрдэнийн хэлснээр ирэх сард товлосон АН-ын Их хурлаар дараагийн даргад нэр дэвшигчдээ тодруулахаас эхлээд 2024 оны сонгууль хүртэл тус намын баримтлах бодлого тодорхой болох учиртай. Дараагийн даргаа тодруулахаас эхлээд парламентын сонгуулийн ялагдлын шархаа нөхөх эцсийн найдвар нь АН-ын хувьд орон нутагт амжилттай өрсөлдөх эсэх болчихоод буй. Уг зорилгоо биелүүлэхийн тулд удирдлагын тогтолцоондоо хэрхэн салхи оруулах, хэнээр ирэх дөрвөн жилд залуурдуулах нь АН-ын нэн тэргүүний зорилго гэлтэй.

С.Сүлд