Улсын баяр наадам болоход ердөө зургаа хоног үлдэж байна. Бөхчүүдийн бэлтгэл ерөнхийдөө жигдэрчээ. Хүчтэний өлгий Төв аймгийн Дүнжингарав дэвжээнийхэн наадмын сорилго барилдаанаа зохион явуулж, хүчит 64 бөх барилджээ. Энэ барилдаанд Баянчандмань сумын харьяат, аймгийн хурц арслан Э.Ууганбаяр түрүүлж, аймгийн арслан Д.Хүдэрбулга үзүүрлэсэн байна. Харин их шөвөгт улсын заан Б.Батмөнх, улсын начин Г.Ганжад нар шалгарлаа. Түрүү бөх Э.Ууганбаярын хувьд өнгөрсөн жилийн наадмаар цолонд хамгийн ойр гэгдэж байсан аймгийн арслан Б.Түмэндэмбэрэл Ш.Пүрэвгарьд нарыг давж, дөрвийн даваанд улсын начин Б.Амарзаяад унасан юм. Э.Ууганбаярыг өнөө жил улсын цол хүртэх бөхөөр нэрлэх бөх сонирхогч олон байгаа билээ.
Б.Жаргал
