Сонгуулийн дараалсан ялагдлаас үүдсэн Ардчилсан намын шинэчлэл дараагийн даргаа сонгох үйл явцаар үргэлжилж байна. 2017 онд нийт гишүүдээсээ сонгогдсон ч 2020 оны ээлжит сонгуульд тааруухан амжилттай оролцсон С.Эрдэнэ өөрийн хүсэлтээр Намын даргаасаа огцорч, УИХ-ын гишүүн Ц.Туваанд тамгаа түр шилжүүлээд байгаа юм. АН-ын Дотоод сонгуулийн хорооны даргын онцолсноор өнөөдрөөс энэ сарын 9-нийг хүртэл хугацаанд АН-ын даргад нэр дэвшүүлэх хүмүүсийн бүртгэлийг эхлүүлжээ.

Энэ сарын 16-наас наймдугаар сарын 14-нийг хүртэл Намын даргын сонгуулийн сурталчилгаа явуулж, 16-нд даргаа сонгох аж. Нэг үгээр санал өгөх эрхтэй 200 мянга гаруй гишүүнээс АН-ын шинэ дарга тодрох нь.

З.Энхболдыг АН-ын даргаар ажиллаж байхад Намын удирдлагад нэр дэвшигчдэд 250 сая төгрөгийн босго тогтоож, С.Эрдэнэ тэргүүтэй нэр бүхий таван хүн өрсөлдөж байв. Харин энэ удаад нэр дэвшигчдээс ямар нэгэн дэнчин, бүртгэлийн хураамж авахгүй. Зөвхөн хөндлөнгийн аудитын байгууллагаар хянагдсан сонгуулийн зардлыг хувь тэнцүүлэн гаргахаар зохион байгуулах гэнэ.

Үүнтэй холбогдуулж, АН-ын даргад нэр дэвшигчдийн сунгаа өнөөдрөөс албан ёсоор эхэлж байна. С.Эрдэнийг албан тушаалаасаа түдгэлзсэний дараа сайд асан Ц.Оюунгэрэл Намын даргад өрсөлдөхөө мэдэгдсэн. Түүний араас гишүүн асан Р.Амаржаргал тэргүүтэй “ахмад” улстөрчид нь өрсөлдөхөөр бүртгүүлсэн гэх мэдээлэл байгаа юм.

Тэгвэл АН-ын даргад өрсөлдөх сонирхолтой дараагийн хүнээр Худалдаа аж үйлдвэрийн танхимын дарга О.Амартүвшин нэрлэгдэж байна.

“Спирт бал бурам”, “Мобиком” зэрэг компаниас ажлын гараагаа эхлүүлсэн түүний хувьд 23 настайдаа маркетингийн албаны захирал болсон гэдэг. 25 настайдаа буюу 2005 онд хувийн бизнесээ эхлүүлж, “UFC” группийг байгуулсан О.Амартүвшингийн улс төрийн замнал тийм ч зузаан биш. 2016 оны УИХ-ын ээлжит сонгуулиар Булган аймагт АН-аас нэр дэвшиж байсан намтартай.

Тухайн үед Намын даргаар ажиллаж байсан З.Энхболдын гэхээсээ одоогийн Ерөнхийлөгч Х.Баттулгатай ойр нэгэн гэдэг тодотгол түүнийг дагах нь бий. Оргүй ч биш ханатай л яриа.

Сонгуульд өвдөг шороодсоноосоо хойш нам гүн явсан тэрбээр 2019 онд дахин ил гарч, Монголын үндэсний худалдаа аж үйлдвэрийн танхимын ерөнхийлөгчид өрсөлдөж, ялалт байгуулсан нэгэн. Танхимын дарга болсноосоо хойш Засгийн газраас авч хэрэгжүүлж байгаа арга хэмжээтэй холбогдуулж, шүүмжлэлтэй байр сууриас хандаж ирсэн тэрбээр энэ удаад АН-ын даргад нэрээ ийнхүү дэвшүүлэх нь. 

Г.Эрхэс