УИХ-ын чуулганы нэгдсэн хуралдаанаар Засгийн газрын бүтэц бүрэлдэхүүнийг хэлэлцэж байна. Энэ үеэр УИХ-ын гишүүн Л.Энх-Амгалан “Чөлөөт бүсийг Шадар сайд, Хилийн боомтыг Сангийн сайдын харьяанд оруулсан байна. Энэ асуудлыг нэгмөсөн Сангийн сайд эсвэл Шадар сайдад нь харьяаллуулбал үр дүн гарна. Яагаад ингэж оруулж ирсэн юм бэ?” гэсэн асуултыг холбогдох албаныхнаас асуусан юм.

Хариуд нь Засгийн газрын Хэрэг эрхлэх газрын Тэргүүн дэд дарга Б.Ганбат “Засгийн газрын бүтцийн тухай хуулийн төсөлд Эдийн засгийн хөгжлийн яамыг оруулж ирээгүй. Хөгжлийн бодлого төлөвлөлтийн хуулийн дагуу “Алсын хараа 2050”-ыг баталсан. Улс орон, дэлхийн хэмжээнд үүсээд байгаа цар тахлын хүрээнд эдийн засгийн бодит нөхцөл байдлаа харгалзаад шинээр яам байгуулахыг чухалчлаагүй. Цаг хугацааны хувьд шахаатай байгаа энэ үед шаардлагагүй гэж үзсэн. Тийм учраас Эдийн засгийн хөгжлийн яам байгуулах шаардлагагүй гэж үзсэн. Хөгжлийн төлөвлөлттэй холбоотой асуудлаар Үндэсний хөгжлийн газар үйл ажиллагаа явуулаад байж байна. Төсвийн бодлоготой нягт уялдаад явж байх ёстой. Яамдын хүрээнд өнөөгийн төвшинд зохицуулаад явах бүрэн боломжтой.

Хилийн боомтын асуудал одоо хүчин төгөлдөр мөрдөж байгаа хуулийн хүрээнд хийсэн зохицуулалт. Хилийн тухай хуулиар Боомтын зөвлөл гэж байдаг. Үүнийг Сангийн сайд толгойлдог. Өмнө нь байсан хуулийн зохицуулалтыг хэвээр нь оруулж ирсэн” гэв.

Харин Ерөнхий сайд У.Хүрэлсүх “УИХ-ын сонгуулиар ард түмэн тогтвортой байдлыг хүссэн. Сандал ширээ зөөгөөд байх шаардлагагүй. Нэг Засгийн газар байгуулах гэж олон яамыг татан буулгаж, томоохон төсөл хөтөлбөрийг гацааж болохгүй. Улсын Ерөнхий сайдын хувьд Засгийн газраа тогтвортой ажиллуулна. Эдийн засгийн хөгжлийн яамны асуудлаар олон удаа ярьсан. Дараагийн удаа маш сайн бодож төлөвлөж хийх ёстой. Хэрэг эрхлэх газар руу татаад даргынх хүрээнд аваад явах боломжтой. Аль болох хөдөлгөөн бага байя гэж үзсэн. Бүтцийн өөрчлөлт нэрээр төрийн ажил тогтворгүй байж болохгүй. Тогтвортой явж ирсэн бүтцээ хадгалаад явах бүрэн боломжтой. Янз бүрийн донсолгоо хийх шаардлагагүй.

Хилийн боомтын асуудал Сангийн сайдын харьяанд болоод явж ирсэн. Чөлөөт бүсийн асуудал Шадар сайдын харьяанд явж ирсэн. Үүнийг өөрчлөх шаардлагагүй. Цаашид тогтвортой засаглалыг авч явах нь зөв” гэсэн юм.

С.Сүлд