МАН-ын мөрийн хөтөлбөрт тусгасан Соёлын яамыг шинээр оруулсныг эс тооцвол Ерөнхий сайд У.Хүрэлсүхийн УИХ-д өргөн барьж, хэлэлцүүлж эхэлсэн Засгийн газрын бүтэц, бүрэлдэхүүн өмнөх уламжлалаа буюу хуучин загвараа хадгалав. Ерөнхий сайдын зүгээс ч сонгуулийн үр дүнгээр ард түмэн төрийн тогтвортой байдлыг хүсч, сонголтоо хийсэн учраас яамдын бүтэц, бүрэлдэхүүнд өөрчлөлт оруулах замаар сандал ширээ зөөж, бичиг цаас гарздахыг хүсээгүй гэдгээ чуулганы нэгдсэн хуралдааны үеэр илэрхийлсэн.

Мөн түүний танхимд ажиллаж байгаа сайдуудаас нэгээс хоёрыг нь улираан ажиллуулах тухайгаа Намынхаа Бага хурлын үеэр мэдэгдсэн байдаг. Өөрөөр хэлбэл, У.Хүрэлсүх Ерөнхий сайд болсныхоо дараа эмхлэн байгуулсан кабенитээс хоёр сайд улирч, хоёрыг нь парламентаас, үлдсэнийг нь гаднаас томилох юм. Ингэхдээ 14 яам, 16 сайдтайгаар ажиллахаа УИХ-аар хэлэлцүүлж эхэлсэн түүний танхимд Ерөнхий сайдаас гадна дөрвөн сайд "давхар дээл"-тэй буюу УИХ-ын гишүүн байх боломжтой гэсэн үг.

Засгийн газрын бүтэц бүрэлдэхүүнийг УИХ-аар хэлэлцэж, эцэслэн баталсны дараа МАН-ын 62 гишүүнээс хэн нь "давхар дээл" нөмрөх эсэх нь тодорхой болох учраас энэ асуудлыг түрдээ азная. Харин улсын төсөвт тодотгол хийх зайлшгүй шаардлагыг үүсгэж, шинээр эмхлэн байгуулахаар болсон Соёлын яамны сайд хэн байх вэ? гэсэн асуулт улс төрд сонирхолтой сэдэв байх нь. Учир нь, Ардчилсан Үндсэн хуулийг баталсны дараа байгуулсан анхны Засгийн газар буюу Ерөнхий сайд П.Жасрайн танхимд Соёлын яамыг тусад нь байгуулж, МАХН-ын дарга Н.Энхбаярыг сайдаар нь томилж байлаа.

Н.Энхбаяр нь 1990-1996 онд Соёлын сайдаар ажиллахдаа соёл, урлагийн салбарын эрх зүйн үндсийг бүрдүүлэхэд гол анхаарлаа төвлөрүүлж, соёлын талаар баримтлах төрийн бодлого, соёлын хуулийг боловсруулах, батлуулахад гол үүрэг гүйцэтгэсэн гэдэг. Үүн шиг Үндсэн хуулийн нэмэлт, өөрчлөлтийн хүрээнд үйл ажиллагаагаа явуулах гэж буй У.Хүрэлсүхийн шинэ танхимын Соёлын сайд нь хэн байх вэ? гэдэг нь мэдээж сонирхолтой. 

Г.Эрхэс