УИХ-ын гишүүний бүрэн эрхээсээ түдгэлзсэн Н.Номтойбаярыг шүүхийн шийдвэрийн дагуу цагдан хорьсон билээ. Тэрбээр Урьдчилан хорих 461 дүгээр ангиас УИХ-ын ээлжит сонгуульд Хан-Уул дүүрэгт бие даан нэр дэвшсэн ч ялалт байгуулж чадаагүй юм.

Н.Номтойбаяр нарт холбогдуулан нийслэлийн Прокурорын газраас Эрүүгийн хуулийн 21.2 /худал мэдүүлэг өгөх/ дүгээр зүйлийн 21.2-1, 22.1 /Эрх мэдэл, албан тушаалын байдлаа урвуулан ашиглах/ дүгээр зүйлийн 22.1-3-т зааснаар яллах дүгнэлт үйлдсэн 21 хавтаст хэргийг Чингэлтэй дүүргийн Эрүүгийн хэргийн анхан шатны шүүх 2020 оны тавдугаар сарын 8-ны өдөр хүлээн авсан билээ.

Энэ дагуу шүүгдэгч Н.Номтойбаяр нарын гэм бурууг хэлэлцэх шүүх хуралдаан энэ сарын 2-ны өдрийн 14:30 цагт эхэлсэн юм. Шүүх бүрэлдэхүүн нотлох баримтыг нягтлан шинжилж, хэрэгт авагдсан материалтай танилцаж байна. Энэ дагуу шүүх хуралдаан дөрөв дэх өдрөө үргэлжилж байна.