Анхдугаар чуулганы нэгдсэн хуралдаанаар Ерөнхий сайд У.Хүрэлсүхээс УИХ-д өргөн мэдүүлсэн Засгийн газрын бүтэц, бүрэлдэхүүний тухай тогтоолын төслийг хэлэлцэж баталлаа. Тогтоолын төсөлд У.Хүрэлсүхийн зангидсан өмнөх Засгийн газрын бүтэц, бүрэлдэхүүнийг нь хуучнаар тусган оруулж ирсэн юм. Харин МАН-ын мөрийн хөтөлбөрт тусгасан Соёлын яам байгуулах асуудлыг тогтоолын төсөлд нэмж, оруулсан байдаг.

Уг асуудлыг хэлэлцэх үеэр УИХ-ын зарим гишүүд Соёлын яам байгуулахыг дэмжиж саналаа хэлсэн юм. Тэдгээрийн нэг нь гишүүн С.Амарсайхан. Тэрбээр “Соёлын яамны асуудал, маш чухал асуудлыг оруулж ирлээ. Энэ бол зөвхөн соёл урлагийн салбарыг хөгжүүлэх асуудал биш. Монгол хүний эрүүл, боловсролтой, чадвартай, иргэний хариуцлагатай, төлөвшилтэй байх, Монгол хүн ямар төвшинд хөгжсөн байх ёстой талаар маш чухал ач холбогдолтой. Бид зам, дэд бүтцийн асуудал ярьсаар хүний хөгжлийн асуудлыг хаясан.

Боловсрол, шинжлэх ухааны сайдын эрхлэх асуудлыг хүрээнд зөвхөн боловсролын тогтолцоог шинэчлэх асуудлыг оруулсан. Үүнийг хүний хөгжил, боловсролын тогтолцоог хөгжүүлэх гэж оруулах боломж байна уу харж үзээрэй. Ном хэвлэлийн асуудлыг Соёлын сайдын эрхлэх асуудалд оруулах нь зүйтэй болов уу. Сурах бичиг болон ном хэвлэлийн уялдаа холбоог хангахгүй бол давхцал, уялдаа холбоонд ойлгомжгүй асуудал үүсэх вий” гэсэн юм.

С.Сүлд