УИХ-ын өнөөдрийн анхдугаар чуулганаар хэд хэдэн хуулийн төслийг эцэслэн баталлаа. Үүнд, Монгол Улсын Засгийн газрын тухай хуульд нэмэлт, өөрчлөлт оруулах тухай хуулийн төслийг эцэслэн батлах санал томъёоллоор санал хураалт явуулахад 61 гишүүнээс 80.3 хувь нь дэмжлээ. Мөн Эрүүл мэндийн даатгалын тухай хуулийн төслийн эцслийн найруулгыг санал хураалтад оролцсон гишүүдийн 79 хувь нь дэмжсэнээр баталсан юм.
Түүнчлэн Монгол Улсын Засгийн газрын бүрэлдэхүүний тухай хуульд нэмэлт өөрчлөлт оруулах хуулийн төслийг эцэслэн батлахыг санал хураалтад оролцсон 62 гишүүнээс 49 нь зөвшөөрснөөр хуулийн төслийг эцэслэн баталлаа.
Өнөөдрийн чуулганд УИХ-ын 75 гишүүнээс 62 нь оролцсон юм.
Ж.Сүхбаатар: Ш.Раднаасэд гишүүн бид хоёр ярилцлаа. Засгийн газрын гишүүдийг томилсон тогтоол хүчингүй болголоо. Тогтоолын төслийг баталсан өдрөөс дагаж мөрдөнө гэхээр Засгийн газрын гишүүд цаашид үүрэг гүйцэтгэх боломжгүй болно. Ерөнхий сайд үүрэг гүйцэтгэгчийг томилно гэхээр УИХ-д танилцуулах журамтай болсон. Хугацаагаа хэрхэн тооцсон бэ.
Г.Занданшатар: Үндсэн хуулийн нэмэлт, өөрчлөлтийн дагуу Анхдугаар чуулган нээлтээ хийсэн цагаас эхлэн Засгийн газрын тухай хуулийн шинэчилсэн найруулга мөрдөгдөж эхэлсэн. Уг хуулиар Засгийн газрын дөрвөөс доошгүй гишүүн нь УИХ-ын гишүүн байж болох зохицуулалттай. Тийм болохоор Засгийн газрын гишүүдийн бүрэн эрх, чадамжийн тогтоолыг хүчингүй болгохоос аргагүй. Тиймээс Засгийн газрын гишүүдийг аль болох хурдан томилох шаардлагатай. Ерөнхий сайд үүрэг гүйцэтгэгчийг томилох замаар асуудлыг шийдэх боломж бий. Засгийн газрын бүтэц, бүрэлдэхүүний тухай хууль өнөөдөр батлагдлаа. Шинэ хуулийн дагуу Ерөнхий сайд захирамж гаргаж, сайд нар, Засгийн газрын гишүүдийг томилно. Ерөнхийлөгч УИХ-д танилцуулна. Тиймээс ойрын хугацаанд энэ асуудал шийдэгдэх байх.
Ш.Раднаасэд: УИХ-ын даргын хэлж байгааг ойлгож байна. Ерөнхий сайд томилогдсоноор Засгийн газрын бүтэц өөрчлөгдөнө. Хуучин сайд нь үүрэг гүйцэтгэгчээр явах байх. Томилсон тогтоолуудыг бүгдийг нь хүчингүй болгочихоор салбар ямар ч удирдлагагүй болно. Гэтэл гэнэтийн асуудал үүсч, түүнийг шийдэх хэрэг гарвал Засгийн газрын танхим бүрдээгүй байдаг, яах вэ. Тиймээс “баталсан өдрөөс” гэдгийн агуулгыг тодорхой болговол яасан юм бэ. Шүд сугалж байгаа юм шиг хийх нь зөв юм уу. Анхаарах ёстой юм шиг. Бүтэц бүрэлдэхүүнд Ерөнхийлөгч хориг тавьбал яах вэ. Хоног алдана, эх захгүй байдал үүснэ. Сүүлдээ ганц Ерөнхий сайд нь танхимын тэргүүнээр үлддэг. Эцэстээ салбар удирдлагагүй болох юм шиг. Үүнээс болгоомжилж байна.
Г.Занданшатар: Ш.Раднаасэд гишүүний болгоомжлолыг Засгийн газар, УИХ-ын Тамгын газар анхаарч ажиллаарай. Монгол Улсын Ерөнхийлөгчтэй зөвшилцсөний үндсэн дээр өргөн барьсан гэлээ.
Үүний дараа хуулийн төслийн эцсийн найруулгыг сонссонд тооцсоноор өнөөдрийн чуулган өндөрлөлөө.
