Ерөнхий сайд У.Хүрэлсүхийн боловсруулсан Засгийн газрын бүтэц, бүрэлдэхүүнийг УИХ-аас ёсчлон баталсан. Үүнтэй холбоотойгоор тэрбээр сайд нарынхаа нэрийг өчигдөр тодорхой болгож, МАН-ын Удирдах зөвлөлөөр хэлэлцүүлсэн юм. Улмаар Үндсэн хуулийн нэмэлт, өөрчлөлтөөр олгосон бүрэн эрхийнхээ дагуу өнөөдөр чуулганы нэгдсэн хуралдаанд сайд нарынхаа нэрийг танилцууллаа. Үүнтэй холбогдуулж УИХ-ын гишүүд сайд нарын танилцуулгаас үүдэж, үг хэлж, асуулт асууж байна. Тухайлбал, Зам, тээврийн хөгжлийн сайдад нэрийг нь дэвшүүлсэн Л.Халтараас УИХ-ын гишүүн Г.Дамдинням Дарханы замтай холбоотой асуулт асуусан юм.

Тэрбээр "Ерөнхий сайдын нэр дэвшүүлж байгаа сайд нарын бүрэлдэхүүнд сэтгэл хангалуун байгаа. Зам, тээвэр хөгжлийн сайдаас Х.Халтарт хандаж Дархан, Сэлэнгэ, Орхон, Төв аймгийн нутгаар дайрч байгаан Монголын хамгийн гол транзит зам болох Дарханы зам гэдэг асуудал таны чихнээс салахгүй шүү. Энэ ажлыг дуусгуулахын тулд таны өрөөнд очоод суучихна шүү. 

Та олон нийтэд Дарханы замыг хэдэн оны хэдэн сард дуусгах боломжтой, төлөвлөгөөгөө танилцуулаарай. Өмнөх шиг сонин цаг хугацаа хэлэхээр ард иргэд чинь ойлгохгүй байна. Үнэн зөвөөр ард олонд хэлээрэй" гэв.

С.Сүлд