УИХ-ын анхдугаар чуулган үргэлжилж байна. Энэ үеэр УИХ-ын гишүүн Д.Ганбат шүүхийн хараат бус байдлыг бий болгох талаар хуулийн ямар шинэчлэл хийж байгаа болон ноолуурын урамшуулал олгох асуудал сонгууль угтсан попроль байсан уу гэдгийг тодруулж асуусан юм. Түүний асуултад гишүүд хариулт өгснийг тоймлон хүргэе.

Л.Оюун-Эрдэнэ: Та парламентад хоёр дахь удаагаа сонгогдсон хүний хувьд жаахан суурьтай бай. Өмнө нь ч ажиглагдсан. Муу, сайн гэж битгий хараачээ. Шударга бус олон асуудал бий. Намаасаа эхлээд алдаагаа хай, Д.Ганбат гишүүн ээ. Ноолуурын асуудлыг та сайдаас нь асуу. Худлаа ярьсан зүйл байхгүй.

Х.Нямбаатар: Шүүхийн тухай хуулийн хувьд гурван зүйл заалт өөрчлөгдсөн. Сахилгын хороо байгуулах, шүүхийг тойргийн журмаар байгуулах боломжийг нээж өгсөн. Шүүхийн тухай багц хуулийг УИХ-д өргөн барьсан. Дараагийн чуулганаар хэлэлцэх хамгийн чухал асуудлыг нэг нь энэ. Монгол Улсын Ерөнхийлөгч мөн шүүгчийн тухай багц хуулийн төслийг өргөн барьсан. Хууль зүйн байнгын хорооноос энэ хуулийн төслийг хэлэлцэх шаардлагагүй гэж үзсэн. Д.Ганбат гишүүний асуусан асуулт энэ хуульд бичигдсэн байгаа.

Ч.Хүрэлбаатар: Эхний зургаан сарын байдлаар төсөв 1.2 их наяд төгрөгөөр тасарсан. Энэ бол цар тахлаас үүдэлтэй. Нүүрс одоогийн байдлаар 8.7 сая тонн улсын хилээр гарсан. Эндээс 332 тэрбум төгрөгийн бууралт бий. Мөн зэсийн үнэ 5000 орсноос бол 130 тэрбум  төгрөгийг атсалдал үүссэн. Түүнчлэн нефтийн үнэ буурснаас болж 73 орчим төгрөгийн бууралт үүссэн. Валютын ханшны хувьд тодорхой хэмжээний савалгаа үзүүлж байна.  

Г.Занданшатар: Цар тахал гарлаа гэж баярлаж, дэвхцэх юм байхгүй шүү. Дэлхий нийтээрээ шоконд орсон. Д.Ганбат гишүүн ээ, шүүхийн багц хуулийн ажлын хэсэгт орж ажиллаарай. Үндсэн хуулиа уншаарай.

Г.Маргад