УИХ-ын чуулганы нэгдсэн хуралдаанаар Ерөнхий сайд У.Хүрэлсүх Засгийн газрынхаа сайд нарыг танилцуулсны дагуу гишүүд нэр дэвшигчдээс асуулт асууж, хариулт авсан юм. Энэ үеэр АН-ын Бүлгийн даргаар томилогдоод удаагүй байгаа Д.Ганбат сайдад нэр дэвшигч зарим хүнээс асуулт асуусан ч асуудлаа мэдэж байж ярихыг гишүүдийн зүгээс сөргүүлэн хаягласан нь түүнийг багагүй эгдүүцүүлэв. 

Улмаар хүссэн хариултаа авч чадаагүй Д.Ганбат гишүүн чуулганы нэгдсэн хуралдааны үүдэнд мэдээлэл хийв. Тэрбээр "Ардчилсан нам Ерөнхийлөгчтэй нягт хамтарч ажиллана. АН-аас нэр дэвшиж сонгогдсон Ерөнхийлөгч. Одоо нам харгалзахгүй ажиллана. Ирэх дөрвөн жил алдагдсан цаг хугацаа битгий байгаасай. Цөөнхийн дуу хоолой нэлээд тод сонгогдсон жилүүд байх болно.

Салбар хариуцсан сайдууд шинэ хүмүүс байна. Тэдний туршлага, болосвролын талаар мэдлэгтэй болъё гэсэн. Гэтэл тийм боломж олгосонгүй.

Бараа бөөндөж авч байгаа юм шиг оруулж ирлээ. Би гэхэд гуравхан сайдаас асуулт асууж чадлаа. Уг нь сайд болгоноос нэгчбүрлэн асуугаад хариулт авах ёстой. Тийм байсангүй. Шинэ сайдууд миний асуултад нэлээд омгорхуу, дээрэнгүй хариуллаа" тунирхав.

Чуулганы нэгдсэн хуралдааны үеэр Д.Ганбат гишүүний асуултад Засгийн газрын Хэрэг эрхлэх газрын дарга Л.Оюун-Эрдэнэ "Та парламентад хоёр дахь удаагаа сонгогдсон хүний хувьд жаахан суурьтай бай.

Өмнө нь ч ажиглагдсан. Муу, сайн гэж битгий хараачээ. Шударга бус олон асуудал бий. Намаасаа эхлээд алдаагаа хай, Д.Ганбат гишүүн ээ. Ноолуурын асуудлыг та сайдаас нь асуу. Худлаа ярьсан зүйл байхгүй" гэсэн бол УИХ-ын дарга Г.Занданшатар "Цар тахал гарлаа гэж баярлаж, дэвхцэх юм байхгүй шүү. Дэлхий нийтээрээ шоконд орсон. Д.Ганбат гишүүн ээ, шүүхийн багц хуулийн ажлын хэсэгт орж ажиллаарай. Үндсэн хуулиа уншаарай" хэмээн анхааруулсан юм.

Г.Эрхэс