УИХ-ын Анхдугаар чуулганаар сайд нарыг танилцуулж, гишүүд асуулт асууж, хариулт авсан билээ. Тэгвэл тун удахгүй сайд нар тангараг өргөх гэж байна. Үүнтэй холбогдуулан Ерөнхий сайд У.Хүрэлсүх парламентийн гишүүд болоод шинээр томилогдох сайд нарт хандаж хатуухан анхааруулга, сануулга өглөө.

Тэрбээр "Цар тахлын энэ үед сайд нарын томилгоог цаг алдахгүй хийсэн УИХ-ын гишүүддээ Засгийн газрын нэрийн өмнөөс талархал илэрхийлье. Сонгууль амжилттай боллоо. Би дөрвөн удаа парламентал сонгогдсон. 30 жил улс төрд явахдаа сайн, муу олныг үзсэн. Энэ удаагийн парламент хөгжлийн парламент байгаасай гэж хүсэж байна.

Ард түмэн ч гэсэн тэгж хүсэж байна. Бидний шударга байгаасай, хулгай битгий хийгээсэй, ЖДҮ-чин бус байгаасай, алдагдсан ордуудаа аваарай гэж сонгосон.

Ард түмний өмнө амлалтадаа хүрнэ шүү. Бид хэлсэн үгэндээ эзэн байна шүү. Наашаа харж нэг зүйл ярьж, цаашаа харж өөр зүйл ярихгүй шүү.

Би хулгай хийвэл шоронд явна, амлаж байна. Нэг ширхэг хадаас байсан ч хулгай. Хуулийн хүрээнд ажиллана. Парламентийн гишүүд сайд нараас олон зүйл гуйдаг, шахдаг тохиолдол гардаг. Тийм зүйл битгий гаргаарай.

Шахалт дарамт үзүүлж, гуйж гувшиж ажлаа амжуулах гэвэл шалгана шүү гэдгийг МАН-ын даргын хувьд хэлчихье. Эх орноосоо хулгай хийдэггүй жишиг парламент байцгаая.

Сөрөг хүчинтэйгээ хамтарч ажиллана, хүндэтгэлтэй хандана. Шүүмжлэлийг хүлээж авна. Гэхдээ доромжлолыг хүлээж авахгүй. Намын дотоод асуудалд битгий ороорой. Бид танай намын дотоод асуудалд орохгүй гэдгээ хэлье.

Бид дайсан биш, эх орныхоо төлөө явж байгаа монгол хүн. Өөрийн аминчхан эрх ашгийн төлөө элдэв юм ярьж, ажил хийлгэдэггүй тээглэсэн нөхдүүд парламентад байсан. Ард түмэн тэдэнд дүн тавьж, дахиж сонгосонгүй. Цаашид ийм нөхдүүд Монголын улс төрөөс хол байна гэж найдаж байна.

Шүүмжлэх зүйл, санал болгох зүйл байвал миний өрөөний үүд нээлттэй.

Дахиад хэлье. Сайд нар хууль бус зүйл хийхгүй шүү. Хийвэл шоронд явна шүү. Засаг барьж явсан олон хүн алдаа, оноо гаргаснаасаа болж хуулийн хаалга татсныг мэдэж байгаа биз” гэлээ.

Г.Маргад