УИХ-ын гишүүн асан Н.Номтойбаярт Чингэлтэй дүүргийн Эрүүгийн хэргийн анхан шатны шүүхээс 5.5 жилийн хорих ял оноосон билээ. Тэгвэл өнөөдөр түүний өмгөөлөгч Н.Мандах мэдээлэл хийлээ.
Тэрбээр “Н.Номтойбаярыг эрх мэдэл, албан тушаалаа урвуулан ашиглах гэсэн зүйл заалтаар яллах дүгнэлт үйлдсэн. Түүнд оноосон 5.5 жилийн хорих ял одоогоор батлагдаагүй. Шүүхээс түүнийг “мөрдөгчийг утсаар дарамталсан” хэмээх нотлогдоогүй шалтгаанаар цагдан хорьсон. Мөрдөгчийг дарамталсан зүйл гаргаагүй. Хэрэгт авагдсан зүйл нь нотлогдоогүй. Чухам ямар агуулгатай, ямар үйл явдал болсныг хэвлэлийнхэн шүүхээс тодруулаарай. Н.Номтойбаярын хувьд цагдан хоригдсон цагаасаа хойш эрх нь зөрчигдсөн.
Би төрийн өндөр эрх мэдэл бүхий албан тушаалтан, жирийн иргэдээс эхлээд өмгөөлөгчгүй шүүх хуралдаж, яллах дүгнэлт үйлдсэн анхны шүүх хурлыг үзлээ. Бид цаашид давж заалдах шатны шүүхэд гомдол гаргана.
Монгол Улсын Үндсэн хуульд зааснаар, хүн өөрийгөө өмгөөлөх, өмгөөлүүлэх эрхтэй. Гэтэл шүүх хуралд ганцхан Н.Номтойбаяр өмгөөлөгчгүй оролцсон. Мөн УИХ-ын сонгуульд нэр дэвшиж буй эрхэмтэй холбоотой шүүн таслах ажиллагаа хийх шаардлагатай бол шүүх Сонгуулийн ерөнхий хорооноос зөвшөөрөл авах ёстой байсан. Гэтэл шүүх огт зөвшөөрөлгүй шүүн таслах ажиллагааг явуулсан. Мөн хэрэгт авагдсан зүйл ангийг өөрчилсөн. Зорилтот бүлэгт олгодог зээлийг банкаар хүү тооцож олгосонгүй гэж Н.Номтойбаярыг шүүх буруутгаж байна" гэв.
Г.Маргад