УИХ-ын сонгуулийн үр дүн, түүнийг тойрсон томилгооны шүүмжлэлд “дуниартсан” монголчууд Үндэсний их баяр наадмын уур амьсгалд нийтээрээ шилжлээ. Хязаалан морьдын уралдаанаар эхэлсэн Үндэсний их баяр наадам цөөхөн монголчуудын омогшиж, огших нэг шалтгаан болов. Өмнөх, өнгөрсөн жилүүдийн энэ өдрүүдтэй харьцуулахад тэнгэр хангай хураа харамгүй хайрлаж буй нь зарим нэгэнд нь бухиамдах сэдлийг төрүүлж байх шиг.

“Аз жаргалтай” Улаанбаатарыг цогцлоох ялсан намын амлалт, хэдэн өдөр дараалан орсон борооны усанд тараа таниулж, түүн дээр нь дөрөөлөх бусад улстөрчдийн хоржоонтой гэмээр байр суурь, хошигнох заримынх нь тайлбар нийслэлийн оршин суугчдыг нийтээр нь бухимдуулах цорын ганц шалтгаан болов.

Уурласан, бухимдсан, эгдүүцсэн, шүүмжлэл бүхий зураг, хөрөгтэй сэтгэгдэл олон нийтийн сүлжээнд өдөр бүр хөвөрч байгаа нь үүний илрэл. Хажуугаар нь Ерөнхийлөгч Х.Баттулгын хамааралтай гэх XIII зуун амралтын газарт, баяр наадмынхаа нээлтийг үзэгчгүй хийж, Есөн хөлт цагаан тугаа цэнгүүлэн, мандуулахаар болсон нь нэгэн жарны турш Төв цэнгэлдэхэд наадамлаж ирсэн монголчуудын дургүйцлийг их, багаар төрүүлэх нь тэр. Эдгээр дүр зураг бол өнөөгийн, өнөөдрийн Улаанбаатарт өрнөх болсон үйл явдлын хураангүй.

Харин энэхүү үйл явдал, эсэргүүцэл, шүүмжлэлтэй зэрэгцэн Истанбул-Улаанбаатар чиглэлийн тусгай үүргийн нислэгээр ирж явсан МИАТ-ийн агаарын хөлөгт нэгэн эх амаржиж, хоёр ихэр охин төрүүлсэн нь нийгмийн сөрөг хандлагыг тас цохиж, зөөллөх шалтгаан болов. Тэгэх нь ч аргагүй. Коронавирусийн цар тахлын хүрээнд дэлхийн улс орнууд хилээ хааж, дотооддоо хөл хорио тогтоосон нь одоо ч үргэлжилж байна. Гадаадад гацсан иргэдийн төлөөлөл ч өөрсдийн нөхцөл байдлаа түгээж болох бүхий л хувилбар, мэдээллийн хэрэгслээр дамжуулан түрүүчээсээ илэрхийлэх болсоор удаж буй. 

Тэр бүгдэд Монголын Засгийн газар, Улсын Онцгой комисс тэргүүтэй албаныхан холбогдох тайлбар өгч, иргэдээ татан авчрах ажлыг шат дараатай зохион байгуулж эхлээд хэдэн сарын нүүрийг нүүрийг үзэв. 

Бусдынхаа хийж хэрэгжүүлж, цаг тухайд нь авч байгаа арга хэмжээнд бид хүлээцтэй хандах нь зүйн хэрэг. Байж болох бүхий л боломж бололцоогоо эрэлхийлж байгаа тэдний ажилд хүндэтгэлтэй ханддаггүй юм гэхэд хүлээцтэй байх хэрэгтэй. Шүүмжилдэг шигээ баярласнаа илэрхийлж чаддаг байх нь чухал гэсэн үг.

Гагцхүү Засгийн газар, Улсын Онцгой комиссын шийдвэрийн хүрээнд гадаадад гацсан иргэдээ тусгай үүргийн онгоцоор татан авчрах ажлыг зохион байгуулах үеэр агаарын хөлөгт ихэр хүүхэд мэндэлсэн нь баярлахгүй байхын аргагүй онцгой ховор үйл явдал мөн үү мөн.

Энэ удаад Улсын онцгой комисс, түүний бүрэлдэхүүнд багтсан, үүрэг хүлээсэн, эх, хүүхдийг эсэн мэнд амаржуулсан бүгдэд талархал илэрхийлье. Тэгээд ч танай, манай нам, түүний, энэний зохион байгуулсан ажил гэхээсээ нэгдсэн нэг зорилго, тэмүүлэлтэй Монгол Улсын иргэд, эд эсийг бид өөрсдөө бүрдүүлж байгаа нь чин үнэн.

Ташрамд дурдахад Истанбулаас Монголыг зорьсон тугсай үүргийн нислэгт багтаж, замын дунд амаржсан эх 42 настай, гурав дахь төрөлт нь байсныг энд тодотгох хэрэгтэй. Эсэн мэнд хорвоод мэндэлсэн ихэр охид үнэхээр эх орон руугаа тэмүүлж, эхийнхээ сэтгэлийг дэвтээсэн нь үгээр илэрхийлэхийн аргагүй онцгой хувь тохиол юм.

Эцэст нь тодотгоход ээж хүн эх нутаг, элгэн саднаа зорьжээ. Энхрий үрс нь эх орон руугаа тэмүүлжээ. Энэ бүх хүсэл, тэмүүлэл нь тэндий хүсэл, зорилгыг унтраасангүй.

Эх нутагтаа очихоор гэгэлзэж, тэмүүлсэн эх хүний сэтгэл, хүсэл зорилго үхэл, амьдралтай өрсөлдөн байдаг хорвоогийн жамыг туулж, төрсөн биеэ хувааснаар ийн биелжээ. Энэ бүхний гэрч болохын зэрэгцээ эх хүүхдийг эсэн мэнд амаржихад дэргэд нь байж, холбогдох арга хэмжээг авч ажилласан эмнэлгийн болон холбогдох албаны албан хаагчдадаа мэхийн ёслоё.   

/Эх хүүдийг амаржих үед эх баригч Ёндондаваа, хүүхдийн их эмч Отгончимэг, П.Сугармаа, ЭХЭМҮТ-ийн тасгийн сувилагч Буянжаргал нар шаардлагатай арга хэмжээг авч ажиллажээ. Энэ үеэр онгоцны нисгэгч хамгийн боломжит хурдаараа нислэгээ удирдан, цагаасаа 30 минутын өмнө ирсэн байна. Эх сурваж-УОК/

С.Гандөл