Истанбулаас Монголыг зорьсон тусгай үүргийн нислэгийн үеэр жирэмсэн эх амаржиж ихэр охинтой болжээ. Сайн мэдээ. Магад ээлжит сонгуулийн үр дүнгээс хамаарсан улстөржилтийг зөөллөсөн хамгийн гэгээлэг мэдээ нь байж болох.

Тусгай үүргийн онгоцонд эх хүүхэд амаржих үеэр эх баригч Ёндондаваа, хүүхдийн их эмч Отгончимэг, П.Сугармаа, ЭХЭМҮТ-ийн тасгийн сувилагч Буянжаргал нар шаардлагатай арга хэмжээг авч ажиллажээ. 

Энэ үеэр онгоцны нисгэгч хамгийн боломжит хурд буюу энэ салбарын мэргэжлийн хэллэгээр яаравчилж, цагаасаа 30 минутын өмнө газарджээ.

Коронавирусийн цар тахалтай холбогдуулж, Улсын комиссын шийдвэрээр хөл хорио тогтоосон энэ цаг үед гадаадад гацсан иргэдийнхээ хүсэлтэд тулгуурлаж, тусгай үүргийн онгоц нисгэж холбогдох арга хэмжээг авч эхэлсэн нь алга таших шалтгаан. Уг ажлын хүрээнд нэн түрүүнд хүн өвчтэй, амхад настан болон жирэмсэн эхчүүд, бага насны хүүхдүүдийг нэн тэргүүнд татах ажлыг Улсын онцгой комиссоос зохион байгуулж байгаа юм.

Гэхдээ энд нэг асуудал байна. Тэр нь онгоцонд амаржсан ихэр охидыг эх оронд нь эсэн мэнд авчрахад голлох нөлөөтэй буюу агаарын хөлгийг жолоодсон нисгэгч нар. Монголчууд мартахдаа амархан.

Хамгийн анх БНХАУ-ын Ухань хотод сурч байгаа Монголын 31 оюутан, 1 хүүхэд эх орондоо ирэхэд тийш зорьсон агаарын хөлөг, түүнийг удирдсан нисгэгчийн багийн тухай шагшин магтаж асан нь энэ оны хоёрдугаар сар.

Харин өнөөдөр тусгай үүргийн онгоц, түүнийг жолоодсон баг бүрэлдэхүүн гэхээсээ Улсын онцгой комисс шийдвэрийг магтах нь олон байх шиг. Агаарын хөлөг тэнгэрийн замаа гатлах явцад ихэр охин төрсөн нь баярлаж, шагших үйл явдал ч эсэн мэнд эх оронд нь тээвэрлэж, үндсэн үүргээ гүйцэтгэсэн нисгэгч нар ч гавьяатай юм шүү. 

Г.Эрхэс