Үндэсний их баяр наадам, Ардын хувьсгалын 99 жилийн ойн баяр наадам өнөөдөр эхэлж, адуун сүргийн манлай азарганы уралдаан дөнгөж сая өндөрлөв. Азарга насанд 178 хурдан буян уралдахад Төв аймгийн Баян сумын уяач, Монголын морин спорт уяачдын холбооны тэргүүн дэд ерөнхийлөгч Баасансүрэнгийн Нямжавын хээр азарга түрүү магнайд хурдалж, түмэн олноо баярлууллаа. Ийнхүү Төв аймгийнхан азарга насанд 55 дахь түрүүгээ хүртэж байна.

Аман хүзүүнд Өвөрхангай аймгийн Хужирт сумын уугуул, "Шунхлай" группийн ерөнхийлөгч Пүрэвийн Батсайханы хээр азарга орсон бол араас нь Архангай аймгийн Хотонт сумын харьяат, нийслэлийн алдарт уяач Дуламсүрэнгийн Лхагвасүрэнгийн халтар, Өмнөговь аймгийн Ханбогд сумын харьяат, Нэргүйн Амарбаясгалангийн буурал, Өмнөговь аймгийн Цогтцэций сумын харьяат, УИХ-ын гишүүн Дашдэмбэрэлийн Бат-Эрдэнийн ажнай цавидар азарга айргийн тавд хурдаллаа. Хэдхэн мөчийн дараа их насны уралдаан болно.

Б.Жаргал