Эрүүл мэндийн яамнаас цаг үеийн асуудлаар мэдээлэл хийлээ. Энэ үеэр тус яамны хэлтсийн дарга Д.Нарангэрэл "Коронавирусний халдвар дэлхийн 216 улс, орон, нутаг дэвсгэрт бүртгэгдэж, 13 сая хүн өвчилж, 570 гаруй мянган хүн нас барлаа.
Өмнө нь нэг сарын хугацаанд нэг сая хүн өвчилдөг байсан бол одоо дөрөв хоногийн дотор нэг сая хүн өвчилж байна.
24 цагийн дотор АНУ-д 54 мянган хүн шинээр халдвар авч, 33 мужид өвчлөл эрс нэмэгдэж байна. Тиймээс өвчлөл багатай мужуудаас эмчилгээнд шаардлагатай зүйлсийг тээвэрлэж байна. Үүнтэй холбогдуулан амны хаалт зүүхийг уриалж байна.
Улирлын томуу коронавирусний халдвартай зэрэгцэж явах магадлал өндөр байна.
ОХУ-д 6000 гаруй хүн шинээр халдвар авч, 130 хүн нас барсан бол Тува, Буриад, Эрхүүд халдвар эрчимтэй тархсан хэвээр байна.
