Монгол түмний уламжлал болсон Үндэсний их баяр наадам нийслэлээс 97 км зайтай XIII зуун цогцолборт хоёр өдөр үргэлжилж өндөрлөлөө. Зүлэг ногоон дэвжээнээ хүчит 512 бөх зодоглосноос шинэ аварга, заан, харцага, начин төрсөн нь бөхөд хайртай үзэгч түмнийг баярлуулсан үйл явдал байв. Жил бүрийн наадмын дараа шүүмжлэл дагуулдаг нэг асуудал нь хурдан морины унаач хүүхэд, тэдгээрийн аюулгүй байдалтай холбогддог ч энэ удаад ямар нэгэн бэртэл, гэмтэлгүй наадсан нь чихэнд чимэгтэй мэдээ байв. Үүгээр зогсохгүй баяр наадмын өдрүүдэд иргэдийн амь нас, амар тайван, аюулгүй байдлыг ханган ажилласан цагдаа, онцгой, эмнэлгийн байгууллагын ажиллагсадтай холбоотой гэгээлэг мэдээлэл нэгээр тогтохгүй байсан юм. Тэдгээрээс онцлон хүргэе.

Дорнод аймгийн Халхгол сумын нутаг Буйр нуурт энэ сарын 11-нд аялж явсан нэгэн гэр бүл хүчтэй салхины улмаас хүүхдүүдээ завьтай нь нуурын усанд алджээ. Тухайн үед эцэг, эх нь яах учраа олохгүй сандарч, тэвдэж байх үеэр Хил хамгаалах ерөнхий газрын алба хаагчид арга хэмжээ авч, улсын усан хил орчмоос хүүхдүүдийг эсэн мэнд олсон байна.

Харин гэнэтийн ослоос аврагдсан азтай хүүхдүүд амийг нь аварсан ХХЕГ-ынхан болон завинд нь мөргөж талархсанаа илэрхийлж буй зураг цахим сүлжээнд эерэг сэтгэгдэл төрүүлсэн юм.

Энэ тухай хүүхдүүдийн аав хүнд үед чин сэтгэлээсээ тусламж үзүүлсэн хүмүүс болон Шадар сайд Я.Содбаатар, ХХЕГ, ОБЕГ, Сүмбэр сумын Цагдаагийн хэсгийн хамт олон, Хилийн 0306 дугаар ангийн хилчдэд баярласнаа илэрхийлж, баяр наадмын амралтын үеэр иргэд олноор хөдөө орон нутаг, гол устай газруудад аялж байгаа энэ өдрүүдэд эцэг эхчүүд хүүхдэдээ тавих хараа хяналтаа сайжруулахыг анхааруулсан байдаг.

Улсын их баяр наадмын хоёр дахь өдөр дааганы уралдааныг Хүй долоон худагт зохион байгуулсан. Гарааны зурхайгаас эргэсэн дааганууд барианд орох мөчид долдугаарт хурдалж явсан морины хүүхэд унажээ. Энэ үеэр Цагдаагийн ерөнхий газрын Хэвлэл мэдээллийн төвийн мэргэжилтэн, цагдаагийн дэслэгч Х.Баднаажонон унаач хүүхдийг яаралтай тосч аван эмнэлгийн ажилтнуудад хүргэж өгчээ.

"Баянгол дүүргийн 6 дугаар хорооны нутаг дэвсгэрт машины ард өөрийгөө боомилсон байдалтай хүүхэд байна" гэх дуудлага мэдээллийг өчигдөр 20 цаг 24 минутад ирэхэд цагдаагийн байгууллагад иржээ. Дуудлагын дагуу Баянгол дүүргийн цагдаагийн Хоёрдугаар хэлтсийн эргүүлийн офицер цагдаагийн ахмад Г.Жонон, эргүүлийн цагдаа жолооч, цагдаагийн дэд ахлагч Ч.Отгонтөр нар маш шуурхай буюу нэг минутын дотор очсон байна.

Тэднийг очиход 11 настай хүүхэд "Стана" маркийн автомашины ард талын тээшнээс уясан уяагаар тоглож байхдаа санамсаргүй байдлаар хоолойгоо боомилж ухаангүй шокийн байдалтай, бие нь хөрсөн байдалтай байжээ.

Алба хаагчид яаралтай арга хэмжээ авч эмнэлгийн анхан шатны тусламж шуурхай үзүүлж Яаралтай түргэн тусламж 103 иртэл, амьсгал дэмжих массажийг 20-иод минут хийж ухаан оруулсан байна.

Г.Эрхэс