Дорноговь аймгийн баяр наадмын хүчит бөхийн барилдаанд 128 бөх барилдахад Хөвсгөл сумын харьяат, аймгийн заан Б.Бат-Эрдэнэ түрүүлж, арслан цол хүртлээ. Баяр наадмын хүчит бөхийн барилдаанд бөхчүүд уран мэхийг уралдуулан сайхан наадлаа гэхийн цаана наадамд зодоглоогүй бөхийг бүртгэлд оруулан бичиж наадамчин олныг мэхэлжээ. Дорногвь аймгийн Баяр наадмын нэгийн давааны эрэмбэд Төв аймагт ажлаа хийж явсан улсын начин А.Хатансайханыг оруулсан нь олны бухимдуулж байна. Начин А.Хатансайхан энэ үеэр Төв аймгийн Эрдэнэ сумын нутагт орших XIII зуун цогцолборт Улсын баяр наадмын бөхийн барилдааны хөлийн цэцээр ажиллаж байсан юм. Түүнийг оноолтод оруулаад зогсохгүй сумын заан Б.Ёндонд унасанаар бичжээ. Энэ талаар А.Хатансайхан начин "Миний бие аймгийн баяр наадамд бүртгүүлээгүй байхад нэгийн даваанд унаснаар түүхэн баримт бичигт үлдээж, нэр төрд халдаж байгааг эсэргүйцэж байна. Энэхүү үйлдэлдээ аймгийн Үндэсний бөхийн холбоо болон Үндэсний бөхийн салбар хороо тайлбар хийхийг шаардаж байна" гэжээ.