Эрүүл мэндийн яамнаас цар тахлын нөхцөл байдлын талаар мэдээлэл хийх үеэр Цэргийн төв эмнэлэгт эмчлүүлж байгаа таван хүний биеийн байдал хүндэвтэр буйг хэлтсийн дарга Д.Нарангэрэл хэллээ. Тэрбээр "Коронавирус халдвар дэлхийн 216 улсад бүртгэгдэж, 13,432,000 рүн өвчилж, 580 мянган хүн эндсэн мэдээлэлтэй байна. Одоогоор 7.8 сая хүн эдгэрч эмнэлгээс гарсан бол 5.2 сая хүн эмнэлэгт хэвтэн эмчлүүлж байна. 

Манай улсын хувьд өнөөдрийн байдлаар 56 хүн шинээр ажиглалталтад орж, 75 хүн ажиглалтаас гарч гэрийн тусгаарлалтад шилжсэн. Ингэснээр нийт 2,791 хүн ажиглалтад байна. 

Тэдгээр хүмүүсийн 156 нь 1-5 насны хүүхэд, 104 нь жирэмсэн, 202 нь архаг хууч өвчтэй хүмүүс байна. Тэдгээр хүмүүст 43 их эмч, 67 дадлагжигч эмч эмчилгээ үйлчилгээ үзүүлж байна. 

Тусгай үүргийн онгоцоор ирсэн 45 хүн Цэргийн төв эмнэлэгт хэвтэн эмчлэгдэж байгаагаас таван хүнийх нь биеийн байдал хүндэвтэр, эрчимт эмчилгээний тасагт эмчлүүлж байна" гэсэн мэдээллийг өглөө.