ОХУ-ын Ерөнхийлөгч Владимир Путин ОХУ, Монгол Улсын найрсаг харилцаа, стратегийн иж бүрэн түншлэлийн гэрээг соёрхон батлах тухай хуульд энэ сарын 13-нд гарын үсэг зуржээ. Энэ тухай ОХУ-ын хуулийн албан ёсны цахим хуудаст мэдээлсэн байна. ОХУ-ын Ерөнхийлөгч В.Путин 2019 оны есдүгээр сарын 3-нд Монгол Улсад албан ёсны айлчлал хийх үеэр уг гэрээнд гарын үсэг зурсан юм.

Гэрээнд заасны дагуу талууд бие биенээ найрсаг, тэгш, бүрэн эрхт тусгаар улс гэж үзэх бөгөөд харилцан итгэлцэл, түүхэн уламжлалт сайн хөршийн харилцаа, иж бүрэн стратегийн түншлэл болон харилцан ашигтай бүх талын хамтын ажиллагааны үндсэн дээр хамтран ажиллахаар болж байна.

Мөн иж бүрэн стратегийн түншлэлийн хүрээнд талууд улс төр, батлан хамгаалах, аюулгүй байдал, эдийн засаг, худалдаа, санхүү болон хөрөнгө оруулалт, дэд бүтэц, тээвэр болон зам харилцаа, эрчим хүч, мэдээллийн технологи, хүмүүнлэгийн харилцаа, соёл, урлаг, боловсрол, шинжлэх ухаан-техник, экологи, эрүүл мэнд, эрүүл ахуй-тахал судлал болон хоёр талын ашиг сонирхлыг төлөөлөх бусад салбарт хамтын ажиллагаагаа тогтвортой, урт хугацаанд хөгжүүлнэ.

Энэхүү гэрээг ОХУ-ын парламентын доод танхим болох Төрийн Дум зургаадугаар сарын 23-нд, парламентын дээд танхим буюу Холбооны улсын Зөвлөл долоодугаар сарын 8-нд баталсан юм. 

Ташрамд дурдахад, Найрсаг харилцаа, иж бүрэн стратегийн түншлэлийн тухай Монгол Улс, ОХУ-ын гэрээг соёрхон батлах тухай хуулийн төслийг УИХ-аар өнгөрсөн оны арваннэгдүгээр сард хэлэлцэж, соёрхон батлахыг дэмжсэн юм.

Хуулийг баталснаар хоёр улсын харилцаа, хамтын ажиллагааг улс төр, эдийн засаг, худалдаа, бизнес, дэд бүтэц, хүмүүнлэгийн харилцаа зэрэг бүхий л чиглэлээр өргөжүүлэн хөгжүүлж, иргэд хоорондын хэлхээ холбоог сайжруулах нөхцөл бүрдэнэ гэж үзэж байна. Тухайлбал, хоёр улс бие биедээ нээлттэй эдийн засгийн бодлого явуулж, хоёр талын худалдааг хурдацтай хөгжүүлж, бизнесийн болон бусад аж ахуйн үйл ажиллагаанд таатай нөхцөл бүрдэнэ хэмээн үзсэн байдаг.

С.Сүлд