Засгийн газрын ээлжит хуралдаан үргэлжилж байна. Хуралдаанаар цэцэрлэг, сургуулийн нээлтийг есдүгээр сарын 1-нээс эхлүүлэхээр шийдвэрлэсэн юм. Ингэхдээ тодорхой шат дараатай байхаар шийдвэрлэжээ. Үүнээс гадна зарим томилгоог хийжээ. Тодруулбал, Гадаад харилцааны яамны Төрийн нарийн бичгийн даргаар Н.Анхбаярыг томилсон байна. Н.Анхбаяр нь тус яамны Төрийн захиргаа удирдлагын газрын даргаар ажиллаж байсан юм. Мөн Австралид суух Элчин сайдаар томилохоор нэрийг нь оруулж ирж байсан ч дэмжлэг авч чадаагүй байдаг.

Н.Анхбаяр нь хуульч мэргэжилтэй, 2000 онд УИХ-ын Тамгын газраас ажлын гараагаа эхэлсэн нэгэн. 2007 оноос Гадаад харилцааны яам, дипломат албанд тасралтгүй 13 жил ажиллажээ. Тодруулбал, 2007-2012 онд Гадаад хэргийн яамны Гэрээ эрх зүйн газар мэргэжилтэн, атташе, дэд захирлаар, 2012-2014 онд АНУ-ын Сан-Франциско хотод Ерөнхий консулаар, 2014-2016 онд Гадаад харилцааны яамны Хуулийн хэлтсийн дарга, Хүний эрхийн хэлтсийн дарга, Консулын газрын дэд захирлаар, 2016 оны сонгуулийн дараагаас ГХЯ-ны Төрийн захиргаа удирдлагын газрын даргаар ажиллаж байгаа аж.