Коронавирусийн цар тахлын хүрээнд гадаадад байгаа иргэдээ татах ажлыг Засгийн газар, Улсын онцгой комиссоос шат дараатай авч хэрэгжүүлж байгаа. Гэвч татан авчирсан иргэдээ тусгаарлах байрны хүрэлцээ тааруухан буйг холбогдох албанаас өгөх болсон. Гэхдээ дотоод нөөцөө сайн дайчилбал тусгаарлах байрны хүрэлцээг нэмэх бүрэн боломжтойг илэрхийлэх хүн цөөнгүй байгаа юм.

Тэдгээрийн нэг нь “Монос”-ын тодотголтой УИХ-ын гишүүн асан Л.Эрдэнэчимэг. Тэрбээр Засгийн газарт туслах хүсэлтэйгээ илэрхийлж, гэр бариад тусгаарлах саналыг дэвшүүлсэн нь Үндэсний их баяр наадмын үеэр. 

Энэ тухайгаа “Олны хүч оломгүй далай. Компаниудаа уриалаад Хүй 7 худагт 1000 гэр барьж болно шүү дээ. Манай “Монос" лав 100 гэр бариад 200 иргэдээ авахад бэлэн байна. Хоол унд, халдвар хамгааллаа 100 хувь даана. Манайд олон эмч нар ажилладаг. Өргөсан тангаргаа санаж, ажиллах боломжтой шүү.
Зуны дулаан цагийг ашиглаад хүмүүсээ авчихмаар л байна шүү дээ. Бүгд л гэрт амьдарч чадна. Хоорондын зайг нь барьж, гэрүүдээ барьчих уудам тал нутаг минь байна. Онгоц бол олдоно оо, олдоно. Уриалгыг дэмжих үү” гэсэн байдаг.

Тэгвэл гишүүн асан Л.Эрдэнэчимэг дахин нэг санал дэвшүүлжээ. Тэрбээр "Иргэний онцгой комиссоос гаргасан мэдэгдлийн дагуу уулзаж, тусгаарлах байрны хүртээмжийг нэмэгдүүлэхэд хамтран ажиллах хүсэлтээ гаргалаа.

100 хүн авах зочид буудлын өрөө тус бүрт "Монос"-ын зүгээс 50 мянган төгрөгийн өдрийн татаас өгье. Хамтран ажиллах компаниуд холбогдоно уу" гэсэн байна. 

Энэ сарын 22-нд Шадар сайд, Улсын Онцгой комиссын дарга Я.Содбаатар болон УОК-ын гишүүдийн төлөөлөл Иргэдийн онцгой комисс санаачлагын төлөөллийг хүлээн авч уулзсан байдаг.

Уулзалтаар Иргэдийн онцгой комисст гадаад улс орнуудад гацсан Монгол Улсын иргэдээс гурван мянга орчим өргөдөл, санал хүсэлт ирсэн тухай Шадар сайдад танилцуулсан юм.

Харин Улсын Онцгой комиссын даргын зүгээс иргэдийн татан авалттай холбоотой мэдээлэл хүртээмжтэй, ил тод байх ёстой талаарх байр суурийг өнгөрөгч баасан гарагт хэвлэлийн хурлаар дамжуулан илэрхийлсэн байдаг.

Тэр дундаа иргэний өгсөн өргөдөл ямар шатанд байгаа, тухайн иргэн хэзээний нислэгт багтах боломжтой зэрэг мэдээллээр хангахыг чиглэл болгосон юм.

Энэ дагуу БНСУ-д суугаа дипломат төлөөлөгчийн газраас эхлэн гадаад улс орнууд дахь Элчин сайдын яамд өөрийн шугамаар дээрх чиглэлийн мэдээллийг байршуулан ажиллаж эхэлсэн билээ.

С.Сүлд