Засгийн газрын өнөөдрийн хуралдаанаар УИХ-ын гишүүн асан Ц.Нямдоржийн хүү Н.Анхбаярыг Гадаад харилцааны яамны Төрийн нарийн бичгийн даргын албан тушаалд томилохоор шийдвэрлэсэн.

Уг шийдвэрийн дагуу Засгийн газрын Хэрэг эрх газрын дэд дарга У.Бямбасүрэн тус яаманд хүрэлцэн ирж Засгийн газрын тогтоолыг танилцуулж, үүрэг даалгавар өгснөөр Н.Анхбаяр үүрэгт ажилдаа орлоо.

Ажил хүлээлцэхэд Гадаад харилцааны сайд Н.Энхтайван, дэд сайд Б.Мөнхжин болон тус яамны газар, нэгжийн удирдлагууд байлцаж, шинээр томилогдсон Төрийн нарийн бичгийн дарга Н.Анхбаярт ажлын амжилт хүсэв.

Төрийн нарийн бичгийн дарга Н.Анхбаяр нь 1979 онд төрсөн. Тэрбээр 2001 онд МУИС-ийн Хууль зүйн сургуулийг эрх зүйч мэргэжлээр төгссөн бөгөөд 2004 онд Шинэ Зеландын Веллингтоны Виктория их сургуулийн Хуулийн сургуульд хуулийн мэргэжлээр магистрын зэрэг хамгаалсан. “Тэргүүн шадар” дипломат цолтой, төрийн болон дипломат албанд 17 жил ажилласан,  салбарын мэргэшсэн албан хаагч юм.