Засгийн газрын ээлжит хуралдаанаар зарим агентлагийн дарга нарыг томилсны нэг нь Д.Загджав байв. Түүнийг Шүүхийн шийдвэр гүйцэтгэх ерөнхий газрын даргаар томилсон нь энэ. Тэрбээр Уул уурхай, хүнд үйлдвэрийн Дэд сайдын албыг хашиж явахад нь уг албанд өөрчлөн дэвшүүлэн томилжээ.

Засгийн газар танхимын зарчмаар ажиллах ёстой гэсэн хуулийн заалт бий ч Дэд сайдаар ажиллаж байсан Д.Загджав салбарын сайд Д.Сумъяабазартайгаа үзэл бодлын зөрчилтэйгөөс гадна Оюу Толгойн Хөрөнгө оруулалтын гэрээний хэрэгжилттэй холбогдуулж, үндсэн бодлогынхоо эсрэг хувийн байр сууриа илэрхийлж ирсэн нь ердөө жилийн өмнөөс тодорсон үйл явдал. Хуульд заасан үндэслэл, хувийн үзэл бодлыг нь харгалзан үзсэн бол түүнийг хэдийнэ Дэд сайдын албанаас нь огцруулах болзлоо тэр өөрөө хангачихсан нэгэн байсан гэсэн үг.

Гэвч ямар шалтгаан, үндэслэлээр улс төрийн албан тушаал гэгддэг Дэд сайдын албан тушаалд Д.Загджавыг “залж”, тогтоож ирснийг нь хэлж мэдэхгүй.

Ямартай ч шинэ Засгийн газрын өнгөн дээр түүнийг Монгол Улсын шүүх байгууллагын шийдвэр, хэрэгжилтийг хангах учиртай агентлагийн даргаар дэвшүүлэн томилсон нь шүүмжлэл дагуулах нэг сэдэв болж байна. Хамгийн хачирхалтай бөгөөд сонирхолтой нь, Д.Загджавыг ШШГЕГ-ын даргаар очоод удаагүй байхад ОХУ-аас Монголд суух Элчин сайд И.Азизов баяр хүргэв.

Эрхэм Элчин сайдын баярын захианд өгүүлснээр Д.Загджавыг ШШГЕГ-ын даргаар томилогдсонд яамныхаа болон хувиасаа баяр хүргэжээ.

Мөн “Ажлын замналын энэхүү шинэ үе шат нь олон салбарт ажилласны үр дүн, Монгол Улсын төрийн захиргааны бүтцэд ажилласан асар их туршлага, улс орныхоо ашиг сонирхлын гүн мэдлэгийг Тань улс орны дээд удирдлагууд өндрөөр үнэлж байгаагийн илэрхийлэл мөн шүү” гэжээ.

ОХУ-ын Элчин сайд И.Азизов Д.Загджав даргад баяр хүргэсэн мэндчилгээ хүргүүлснээс хоёр хоногийн дараа Ерөнхийлөгч Х.Баттулга түүнийг өрөөндөө дуудан уулзаж, зарим чиг үүрэг өгсөн тухай мэдээлэл хэвлэлээр гарлаа. Ерөнхийлөгчтэй хийсэн уулзалтын үеэр ШШГЕГ-ын шинэ дарга Д.Загджав улсын хэмжээнд ял эдэлж буй хоригдлын тоо, нөхцөл байдал, шийдвэр гүйцэтгэх ажиллагааны биелэлт, алба хаагчдын ажлын орчин нөхцөлийн талаар мэдээлэл хийж, холбогдох үүрэг чиглэл авсан тухай албаны мэдээнд дурьдсан гэх.

Улс орны хэмжээнд тэмдэглэн өнгөрүүлдэг үндэсний хэмжээний баяр эсвэл сонгуулийн үр дүнгийн дараа сонгогдож, томилогдсон сайд, дарга нарт дэлхийн улс орны төр, засгийн тэргүүн, Элчин сайдууд баяр хүргэж, албан бичиг илгээдэг нь дипломат албанд тогтсон уламжлал.

Харин Монголын Засгийн газар, асуудал эрхэлсэн яамных нь харьяа агентлагийн даргаар томилсон нэгэнд баярын бичиг илгээж, албан ажилд нь амжилт хүсч байсан тохиолдол үгүй. Бараг байхгүй. Сайдад нь амжилт хүсэх л асуудал. Гэтэл хорих байгууллагуудын үйл ажиллагааг зангидаж, бодлого тодорхойлуулахаар томилсон даргад ОХУ-ын Элчин сайд нь баяр хүргэхийн сацуу Улсын Ерөнхийлөгч нь өрөөндөө дуудаж уулзан, рапорт сонссон нь урд хожид болж байгаагүй үйл явдал болов.

ОХУ-аас Монгол Улсад суух Элчин сайд И.Азизов, Д.Загджав дарга нарын хооронд хуучны ямар нэгэн холбоо хамаарал байдаг эсэхийг хэлж мэдэхгүй ч Төрийн тэргүүн нь өрөөндөө дуудаж уулзсаны, сүүлийн үеийн мэдээлэл сонссоны цаад шалтгаан юу байв гэдэг нь өөрөө эргэлзээтэй.

Ялангуяа Монгол Улсын Ерөнхий сайдаар ажиллаж байсан гурван ч эрхэмд шүүхээс ял ногдуулсан энэ цаг үед. 

Ташрамд дурдахад, ШШГЕГ-ын дарга Д.Загджав нь Монголын Энхтайван, найрамдлын байгууллагын ерөнхийлөгчийн албыг давхар хавсардаг. Уг байгууллага нь дэлхийн 30 гаруй найрамдалын нийгэмлэг бүхий гадаад орнуудтай харилцаатай ч ОХУ-тай хамгийн ойр харилцаатай явж ирсэн нь өнгөрснөөс өнөөдрийг хүртэл зохион байгуулж ирсэн хамтын ажиллагаанаас тодордог.

Г.Эрхэс