Шадар сайд асан Ө.Энхтүвшинг Монгол Улсаас Францад суух Элчин сайдаар томилох тухай яриа улс төрийн хүрээнд гарч эхэлжээ. У.Хүрэлсүхийг Ерөнхий сайдаар томилогдсон үе буюу 2017 онд Шадар сайдын албан тушаалд очсон тэрбээр 2020 оны ээлжит сонгуульд өөрийн хүсэлтээр нэр дэвшихээс татгалзсан байдаг.

Харин МАН хоёр дахь удаагаа үнэмлэхүй олонхийн байр сууриа хадгалж үлдэхэд түүнийг уг албан тушаалдаа үлдэх тухай яригдаж байсан юм. Гэвч Ө.Энхтүвшин Ерөнхий сайд У.Хүрэлсүхийн танхимд Шадар сайдаар улирч чадаагүй. Харин түүний хүү Ө.Золбоог Барилга, хот байгуулалтын дэд сайдаар томилох шийдвэрийг Засгийн газраас гаргасан. Тэгвэл энэ удаад Шадар сайд асан Ө.Энхтүвшин Франц руу Элчин сайдаар томилогдох магадлал нь өндөр байна.

Зарим хэвлэлд бичсэнээр Ерөнхийлөгч Х.Баттулгын зүгээс Монгол Улсаас гадаадын оронд суугаа зарим Элчин сайдыг эгүүлэн татаж, орных нь хүмүүсийг томилох шийдвэрээ Засгийн газарт танилцуулах бололтой. Энэ хүрээнд Ө.Энхтүвшинг Элчин сайдаар томилох гэнэ.

Ө.Энхтүвшин нь УИХ-ын гишүүнээр 5 удаа сонгогдсон нэгэн. Тэрбээр Засгийн газрын Хэрэг эрхлэх газрын дарга, БСШУ-ны сайд, Шадар сайд, УИХ-ын Төрийн байгуулалтын байнгын хорооны дарга, УИХ дахь МАН-ын бүлгийн дарга зэрэг албыг хашиж байсан туршлагатай. 2012 оны долдугаар сараас 2013 оны арваннэгдүгээр сар хүртэл МАН-ын даргаар ажиллаж байсан юм. Тэрбээр 2017 оны аравдугаар сараас Шадар сайдаар ажиллаж байгаад УИХ-ын сонгуулийн дараа Я.Содбаатарт үүрэгт ажлаа хүлээлгэж өгсөн билээ.

Сонирхуулахад, Монгол Улсаас Франц улсад суух Элчин сайд А.Баттөрийг албан тушаалаа урвуулан ашиглаж мөнгө угаасан гэх хэргээр АТГ-т шалгаж эхлээд байгаа юм.

Түүнийг дипломат албаны дэг журмыг зөрчин албан тушаалаа урвуулан ашиглаж визний хураамжийн мөнгийг хууль бусаар цуглуулсан, түүнийгээ офшор бүсэд угаасан, тэр хөрөнгөөрөө усан үзмийн талбайтай тансаг харш худалдаж авсан зэрэг хэд, хэдэн үндэслэлээр буруутгасан байдаг.

С.Сүлд