Чех улсаас 25 хоног машинд дайгдан эх орондоо ирсэн монгол оюутныг ирэхэд “үүд”-ээ нээж өгөөгүй гэх асуудал өчигдөр өрнөсөн. Тодруулбал, иргэний олон нийтэд хандан хэлснээр УОК-т нэр нь байхгүй учраас ОХУ руу буцахыг шаарджээ.

Түүний цахим хуудсаар хийсэн дээрх мэдээллээс улбаалан “нислэгт нь багтъя гэхээр томчуудын хүүхдүүд дайрна, чадал гаргаад өөрөө ирэхээр хэн ир гэсэн юм” зэргээр ёжтой шүүмжилж, зарим нь дургүйцлээ эрс илэрхийлсэн юм. Уг асуудал сошиалаар газар авсны хүчинд эх орныхоо хилийн гадна хоёр хоног гацаад байсан түүнийг нэвтрүүлэхээр шийдсэн ч байж магад.

Дээрх асуудалтай холбогдуулан УИХ-ын гишүүн Т.Доржханд Засгийн газар, Монгол Улсын гадаад улсуудад суугаа дипломат төлөөлөгчийн газрууд гадаадад хүнд нөхцөлд байгаа иргэдээс илүү улс төрч, тэдгээрийн хамаарал бүхий этгээд, хөрөнгөлөг хүмүүсийг тусгай үүргийн нислэгт багтаах нэрийдлээр авлига авсан, нэхсэн байж болзошгүй асуудлаар Шадар сайд Я.Содбаатарт асуулга хүргүүлжээ.

Асуулгад:

-Гадаад улсад гацсан байгаа иргэдийг эх оронд нь эгүүлэн авчрах үйл ажиллагааг ил тод, тэгш, хүртээмжтэй, шуурхай, хариуцлагатай, зохион явуулах,

-Шинэжлэх ухаан логикт үндэслэн хорио цээрийн дэглэмийн хугацаанд иргэдийг тусгаарлах байрны асуудлыг яаралтай шийдвэрлэх бүх боломжуудыг судлах, ашиглах,

-Монгол Улсаас гадаад улсуудад суугаа дипломат газрууд иргэдээ, ялангуяа эрүүл мэнд, санхүүгийн хувьд хүнд байдалд иргэдээ онцгой анхаарч, эрх тэгш, шуурхай үйлчилгээгээр ханган ажиллах,

-Монгол Улсын иргэний агаарын тээврийн компаниудын нөөц бололцоо үнэхээр хүрэлцэхгүй байгаа тохиолдолд ижил төрлийн үйлчилгээ үзүүлдэг компаниудын хүсэлтийг судалж, нислэгийн тоог нэмэгдүүлэх,

-Ковид19-өөр үүсгэгдсэн цар тахалтай тэмцэх үйл ажиллагаанд зарцуулж буй төсвийн болон хандивын хөрөнгийн зарцуулалтын мэдээллийг ил тод болгох, зарцуулалдтыг эрэмбэлж тодорхой болгохыг хүсжээ.

А.Сүх