Улс төрийн гал тогооныхон ЖДҮ, 60 тэрбумаар хуваагдаж улмаар нийт масс хамарсан “их дайн” өрнөсөн үйл явдал хоёр жилийн өмнө болж байв. Хамгийн анх нэр бүхий 13 гишүүний мэдээлэл ил тод байсан ч энэ тоо 40 гаруй болж өссөн нь нийгэмд шуугиан дэгдээж байлаа. Тэдгээрээс дөрвийнх нь нэрийг прокурорын байгууллагаас нэр цохон онцолж, бүрэн эрхийг нь түдгэлзүүлэхээр өргөн барьж байсан юм.

Нийтэд ил болсон тэдгээр гишүүд нь Г.Солтан, Б.Ундармаа, Д.Дамба-Очир, Л.Энхболд нар байлаа. Үүгээр зогсохгүй Ж.Энхбаяр, Н.Оюундарь, Б.Наранхүү, А.Сүхбат, О.Батнасан, Я.Содбаатар, Б.Саранчимэг, Н.Учрал нар зээл авсан нь баримтаар тодорхой болсон байдаг. Тохуутай нь дээрх нэр бүхий гишүүнээс бүрэн эрхтэйгээ үлдэж чадаагүй нь эхнээсээ ял сонсоод эхэллээ.

Тодруулбал, УИХ-ын гишүүн асан Г.Солтаныг бүрэн эрхээ хэрэгжүүлэх явцдаа өөрийн үүсгэн байгуулсан, захирлаар өөрийн хүү С.Ахмед, менежерээр эхнэр Б.Алтанчимэг ажилладаг өөрийн хамаарал бүхий “Монгол шаазан” ХХК-д “Малын тэжээл үйлдвэрлэх” төслийн зориулалтаар урт хугацааны хөнгөлөлттэй зээл авахын тулд Улсын Их хурлын гишүүн бөгөөд, Хүнс хөдөө аж ахуй, хөнгөн үйлдвэрийн сайд Б.Батзоригт хууль бусаар нөлөөлөн 950 сая төгрөгийн урт хугацаатай, хөнгөлөлттэй зээл гаргуулсанд гэм буруутайд тооцож нийтийн албанд томилогдох эрхийг таван жилээр хасч, гурван жилийн хорих ял оноосон.

Үүний араас Б.Ундармаа гишүүний шүүх хурал явж байна. Б.Ундармааг Жижиг, дунд үйлдвэрлэлийг хөгжүүлэх сангаас хөрөнгө орлогын мэдүүлэгтээ дурдсан “Доктор МЭИК” компаниараа дамжуулан 700 сая төгрөгийн зээл авсан хэрэгт холбогдуулан 2018 оны арванхоёрдугаар сараас Авлигатай тэмцэх газарт шалгаж эхэлсэн юм.

Өчигдөр гэхэд шүүх хуралдааныг үл хүндэтгэсэн, эрүүгийн хэрэг хянан шийдвэрлэх ажиллагааны явцад санаатай саад учруулсан үндэслэлээр УИХ-ын гишүүн асан Д.Дамба-Очирыг өчигдөр цагдан хорьжээ. Д.Дамба-Очир нь “Сапфир стоун” ХХК-д 1.2 тэрбум төгрөгийг ЖДҮХ-гаас авсан байдаг юм.

Одоо ЖДҮХС-гаас зээл аван, яллагдагчаар татагдсан дөрвөн гишүүнээс Л.Энхболдод холбогдох хэрэг мөрдөн байцаалтын шатанд үлджээ. ЖДҮХС-ээс гурван удаа нийт 3.2 тэрбум төгрөгийн зээл авч ББСБ-аараа дамжуулан бусдад өндөр хүүтэй зээлүүлж, мөнгө хүүлсэн нь мөрдөн байцаалтаар тогтоогдсон гэсэн үндэслэл түүнийг тойрдог.

Түүнчлэн О.Батнасан “Топ кондитер” ХХК-иараа дамжуулан 950 сая төгрөг, Н.Оюундарь “Рэд Стар Клуб” ХХК-иар дамжуулан 800 сая төгрөг, А.Сүхбат “Түгээмэлтүмэн хишиг” ХХК-иар дамжуулан 800 сая төгрөг, Б.Наранхүү “Сингапурхэльткейр сентр” ХХК-иар дамжуулан 800 сая төгрөг, Ж.Энхбаяр “Газар Агро ХХК, Газар Буудай” ХХК-иар дамжуулан 1.9 тэрбум төгрөг авсныг хуулийн байгууллагаас шалгаж эхлээд байна.

Б.Лхам