АН-ын дарга асан С.Эрдэнэ нэгэнтээ хэлж байлаа. "Л.Болд гишүүн АН-аас нэр дэвшиж олон удаа сонгогдсон хүн эргээд намруугаа нулимаад зогсч байгаад харамсч байна" гэж. Үндсэн хууль батлалцахаас эхлээд АН-ыг эрх барих үед Гадаад харилцаа, Батлан хамгаалах салбар хэмээх чухал хоёр яамыг хариуцаж байсан гишүүн нь өрх тусгаарлах болсноо мэдэгдсэн нь гэнэтийн шийдвэр байсан нь мэдээж. 

Харин Л.Болд гишүүн "Миний бие 1990 оны ардчилсан хувьсгалд Монголын оюутны хөдөлгөөнийг толгойлон удирдаж оролцсон цагаас хойш ардчиллын үйл хэргийн төлөө Ардчилсан намын гишүүний хувиар тасралтгүй тууштай тэмцэж ирсэн билээ.

АН-ын өнөөгийн удирдлагын гаргасан зөрчилтэй шийдвэр, УИХ дахь АН-ын бүлгийн даргын хийсэн хууль бус тайлбарыг эсэргүүцэж намд бүрэн шинэчлэл хийгдэх хүртэл намын Үндсэн дүрмийн 3.5-д заасны дагуу намын гишүүнчлэлээс татгалзаж байгааг мэдэгдэж байна” хэмээжээ. Намын гишүүнчлэлээсээ татгалзахгүйгээр УИХ дахь намын бүлгээсээ гарах аргагүй байсан нь ч энэ шийдвэрт нөлөөлсөн болов уу" хэмээн тайлбарлаж байлаа.

Өдгөө, Хан-Уул дүүрэгт "босоо сонголт"-той явсан Л.Болдын хувьд 2020 оны сонгуульд өвдөг шороодсоноор үзэл бодол нэгтээ Ж.Батзандан нарын хамт үүсгэн байгуулсан ШИНЭН-ын Төв зөвлөлийн дарга гэсэн албан тушаалтайгаа үлдээд байгаа юм. Намын дарга Ж.Батзандангийн хувьд сонгуулийн үр дүнг хүлээн зөвшөөрөхийн сацуу албан тушаалаасаа огцорч буйгаа мэдэгдсэн ч өнөөдрийг хүртэл ШИНЭН-ын дараагийн дарга, Төв зөвлөлийн дарга нар тодроогүй байна.

Сонирхолтой нь, ШИНЭН-ын Төв зөвлөлийн дарга Л.Болд Ерөнхийлөгч Х.Баттулгын Аюулгүй байдал, батлан хамгаалахын зөвлөх болсон тухай мэдээлэл түгэж эхэллээ.

Үүнийг баталсан гэлтэй нэгэн ярилцлагыг гишүүн асан Л.Болд өөрөө учирлажээ. Тэрбээр Ерөнхийлөгчийн зөвлөхийн албан тушаалд томилогдсон тухайгаа өдөр тутмын сонинд ярилцлага өгөх үеэрээ дурдсан байна.

Ингэснээр Л.Болд гишүүн Монгол Улсаас гадаадад суух Элчин сайдуудын томилгоо төдийгүй Ерөнхийлөгчид хуулиар олгосон Зэвсэгт хүчний Жанжин штаб, тэдгээрээр хийлгэх болсон төмөр замын бүтээн байгуулалтад голлох нөлөөтэй оролцохоор болж байна.

Г.Эрхэс