Эрүүл мэндийн яамнаас ээлжит мэдээллээ хийлээ. Энэ үеэр ХӨСҮТ-ийн захирал Д.Нямхүү иргэдийн шинжилгээний хариуны талаар танилцуулсан юм.  

Тэрбээр “Энэ сарын 30-нд ХӨСҮТ-ийн вирус судлалын лаборатори, Дархан-Уул аймгийн салбар лабораторид нийт 249 хүний сорьцонд шинжилгээ хийсэн. Бүгд сөрөг гарсан.

Тодруулбал, энэ сарын 29-нд Сөүл-Улаанбаатар чиглэлийн нислэгээр ирсэн 160 хүний эхний шинжилгээ хийлээ. Халдвар илрээгүй. Дараагийн хяналтын шинжилгээнүүдэд анхаарч байна. Мөн ажиглах байранд тусгаарлагдсан 41 хүний давтан, Цэргийн төв эмнэлэгт тусгаарлагдсан найм, тандалтын зорилгоор хоёр, Алтанбулгийн боомтоор орж ирсэн ачаа тээврийн 32 жолооч, Сэлэнгэ аймагт тусгаарлагдсан хоёр хүний давтан шинжилгээ тус тус хийсэн.

Манай улсад коронавирусний батлагдсан 291 тохиолдол байна. Үүнээс 225 иргэнийг эмчилсэн. Одоо 66 хүн эмчилгээнд байгаагаас 62 нь хөнгөн, гурван иргэний биеийн байдал хүндэвтэр, нэг нь хүнд байна.

Тандалт судалгаа үргэлжилж байна. Хамгийн гол нь маскаа зүүх, хүн хоорондын зай барих, олон хүн цугларсан газар онцын шаардлагагүй үед очихгүй байх, орчноо цэвэрхэн байлгах, гараа сайтар угаах, ариутгах чухал юм.

Түүнчлэн манай улсын анхны тохиолдлоор Франц иргэн оношлогдсон. Маш олон хүний хавьтал болсныг бид өмнө нь хэлж байсан. Тэгвэл Франц иргэний талаар нэг сайхан мэдээ дууллаа.

Тэрбээр авсан гэдгээ мэдэхээс өмнө таксинд суух гэтэл жолооч нь маскгүй байжээ. Улмаар жолоочоос маскаа зүүхийг шаардаж, жолооч маскаа зүүн ойрхон газар үйлчлүүлсэн байгаа юм. Жолооч маск зүүснээр халдвараас сэргийлж чадсан байна. Өөрөөр хэлбэл, маскаа тогтмол зүүх нь эрсдэлээс сэргийлэх нэг арга гэдгийг тод жишээ энэ юм гэлээ.

А.Сүх