Чех улсад сурдаг монгол оюутан 25 хоног машинд дайгдан Алтанбулгийн хилийн боомтын гадна гацсан асуудал цахим орчныг доргиож байв. Улмаар хоёр хоногийн дараа холбогдох хүмүүсийн шийдвэрээр хил давж чадсан билээ.

Манай улс ирэх сард 14 удаагийн захиалгат нислэг үйлдэнэ. Нислэгийн хуваарийн дагуу тус улсаас нийт 170 гаруй иргэнээ авчрах бөгөөд иргэдийн нислэгийн зардал, тусгаарлах байрны зардлыг Чех улс хариуцахаар болсон.

Чех улсын Засгийн газрын гаргасан эл шийдвэрийг иргэдийн зүгээс тус улсаас машинаар дайгдан ирсэн монгол оюутантай холбон үзэж байсан бол Бүгд Найрамдах Чех Улсаас Монгол Улсад суугаа Элчин сайд Ийржи Бродский албан ёсны тайлбар гаргажээ.

Тэрбээр твиттер хуудаснаа “Чех улсын Засгийн газраас санал болгож буй нислэг нь Чехээс ирсэн охинтой огт холбоогүй бөгөөд Чехийн Засгийн газар дөрөвдүгээр сарын 10-нд уг нислэгийг санал болгосон болно” гэжээ.

А.Сүх