Эрүүл мэндийн яамны ээлжит хэвлэлийн хурлын үеэр ХӨСҮТ-ийн Тандалт, судалгааны албаны дарга А.Амбасэлмаа "Наймдугаар сарын 1-ний өдөр гурван лабораторид нийт 455 хүний сорьцод шинжилгээ хийхэд 453 хүний шинжилгээнд коронавирус илрээгүй. Харин хоёр хүний дөрөв дэх давтан шинжилгээнд коронавирус илэрлээ. Халдвар илэрсэн иргэд Афганистанаас ирсэн цэргийн алба хаагчид" гэдгийг хэллээ.

Тэрбээр "Нийт батлагдсан тохиолдол 293 болсноос 230 нь эдгэрсэн. Эмчилгээнд байгаа 63 хүний биеийн байдлыг үнэлбэл, 60 нь хөнгөн, гурав нь хүндэвтэр байна. ХӨСҮТ-д нийт 88 хүн эмчилгээ, тандалтад байгаа.

Өчигдөр Сөүл-Улаанбаатарын онгоцоор 260 хүн ирснээс нэг хүнийг ХӨСҮТ-д тусгаарласан. Эдгээр хүмүүсийн шинжилгээ өнөөдөр хийгдэнэ" гэв.