Хуулиар олгосон үүрэг статус нь тэс ондоо ч УИХ-ын дэд дарга С.Одонтуяагаас өөр парламент дахь намынхаа Бүлгийн өмнөөс дуугарах гишүүн өнөөдөр алга. Угтаа бол УИХ-д 11 суудлыг авч, ирэх дөрвөн жил Бүлгийн хэмжээнд үйл ажиллагаа явуулахаар болсон АН-ын бүлгийн дарга нь Д.Ганбат.

Бусдыгаа бодоход өмнө нь УИХ-ын гишүүн, Хууль зүйн байнгын хорооны даргаар ажиллаж байсан туршлагатай нэгэн.

УИХ-ын Анхдугаар чуулганы нэгдсэн хуралдаанаар Ерөнхий сайд У.Хүрэлсүх Засгийн газрынхаа сайд нарыг танилцуулсны дагуу гишүүд нэр дэвшигчдээс асуулт асууж, хариулт авах үеэрээ сайдад нэр дэвшэгчдээс хүссэн хариултаа авч чадаагүй нь Д.Ганбат дарга. Энэ шалтгаанаа "Ардчилсан нам Ерөнхийлөгчтэй нягт хамтарч ажиллана. АН-аас нэр дэвшиж сонгогдсон Ерөнхийлөгч. Одоо нам харгалзахгүй ажиллана. Ирэх дөрвөн жил алдагдсан цаг хугацаа битгий байгаасай. Цөөнхийн дуу хоолой нэлээд тод сонгогдсон жилүүд байх болно.

Салбар хариуцсан сайдууд шинэ хүмүүс байна. Тэдний туршлага, болосвролын талаар мэдлэгтэй болъё гэсэн. Гэтэл тийм боломж олгосонгүй.

Бараа бөөндөж авч байгаа юм шиг оруулж ирлээ. Би гэхэд гуравхан сайдаас асуулт асууж чадлаа. Уг нь сайд болгоноос нэгчбүрлэн асуугаад хариулт авах ёстой. Тийм байсангүй. Шинэ сайдууд миний асуултад нэлээд омгорхуу, дээрэнгүй хариуллаа" тунирхаснаар эцэслэсэн.

Гэвч Анхдугаар чуулган хөшгөө хаахтай зэрэгцэн усан хаясан чулуу мэт алга болж, эцэстээ "эрэн сурвалжлуулах" хэмжээнд хүрээд байгаа хүнээр өнөөх л Д.Ганбат дарга тодорч байна.

Уг нь ээлжит бус чуулганаар хэлэлцэх асуудлын хүрээнд хамгийн түрүүнд дуугарч шаардлага арга хэмжээг хэрэгжүүлэх, түүгээр хэлэлцэх хуулийн төсөлд ямар санал тусгахаа илэрхийлэх нь сөрөг хүчин АН, тэдгээрийг парламентад бодлогоор зангидах үүрэг хүлээсэн Д.Ганбат даргын хийх ёстой ажил баймаар. 

Гэтэл УИХ-ын сонгуулийн үр дүнгээр парламентад 11 суудалтай болж, ард түмнийг төлөөлөх үүрэг хүлээсэн АН-ын бүлгийн үйл ажиллагаа өнөөдрийг хүртэл хугацаанд тодорч чадахгүй яваа Д.Ганбат даргыг ирэх дөрвөн жилийн хугацаанд ямар байдалтай ажиллахыг нь илтгэх шиг.

С.Сүлд