УИХ-ын гишүүн асан УИХ-ын гишүүн асан Б.Батзоригт холбогдох хэргийн шүүх хурлын урьдчилсан хэлэлцүүлэг Баянзүрх, Чингэлтэй, Сүхбаатар дүүргийн Эрүүгийн хэргийн Анхан шатны шүүхэд болж, түүнийг нийтийн албанд ажиллах эрхийг таван жилээр хасаж, 40 сая төгрөгөөр торгох шийдвэрийг гаргалаа.

Тодруулбал, УИХ-ын гишүүн асан Б.Батзоригийг Хүнс, хөдөө аж ахуй, хөнгөн үйлдвэрийн сайдаар ажиллаж байхдаа эрх мэдэл, албан тушаалын байдлаа урвуулан ашиглаж, бусдад давуу эрх олгосон байж болзошгүй асуудлаар АТГ-аас 2018 онд шалгаж, хэргийг шүүхэд шилжүүлсэн байдаг.

Шүүхийн шатанд яллагдагч Б.Батзориг гэм буруугаа хүлээж, прокурорын байгууллагаас Эрүүгийн хуулийн тусгай ангийн 22.1-т заасан "Эрх мэдэл, албан тушаалын байдлаа урвуулан ашигласан", 22.4, 22.5 дугаар зүйлд заасан “Хахууль авах, хахууль өгсөн" гэмт хэрэгт яллах дүгнэлт үйлдэж, хэргийг хялбаршуулсан журмаар шийдвэрлэх санал гаргаж байсан ч шүүх уг саналыг хүлээж аваагүй юм. 

Эргэн сануулахад яллагдагч Б.Батзориг өнгөрсөн дөрөвдүгээр сард өөрийн хүсэлтээр УИХ-ын гишүүний бүрэн эрхээс татгалзсан билээ. 

А.Сүх