УИХ-ын ээлжит сонгуулийн өмнөхөн Ерөнхийлөгч Х.Баттулга Иргэний нийгэм, хүний эрхийн бодлогын зөвлөх  Г.Уянга, Эрүүл мэнд, хүний хөгжил, нийгмийн бодлого, иргэний оролцооны асуудал хариуцсан зөвлөх Д.Үүрийнтуяа, Байгаль орчин, хот, хөдөөгийн хөгжлийн бодлого, агаарын бохирдлын асуудал хариуцсан зөвлөх Д.Пүрэвдаваа, Соёл, шашны бодлогын зөвлөх Ц.Хулан нарыг чөлөөлсөн байдаг. 

Харин саяхнаас чөлөөлсөн зөвлөхүүдийнхээ орных нь хүнийг томилж эхлээд байгаа юм.

Тодруулбал, Аюулгүй байдал, Батлан хамгаалахын бодлогын зөвлөхөөрөө тэрбээр УИХ-ын гишүүн асан, ШИНЭН-ын Төв зөвлөлийн дарга Л.Болдыг томилоод байсан юм. Тэгвэл Ерөнхийлөгч Х.Баттулга дахин нэг томилгоо хийсэн нь Эрүүл мэнд, нийгмийн бодлого, соёлын зөвлөхөөрөө С.Ламбааг томилсон байна.

С.Ламбаа нь инженер, эдийн засагч мэргэжилтэй, УИХ-ын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга, Эрүүл мэндийн сайдаар 2008-2012, 2016 онуудад томилогдон ажилласан туршлагатай. УИХ-ын даргын ахлах зөвлөх, Эрүүл мэнд спортын яамны төрийн нарийн бичгийн дарга зэрэг албыг хашиж байсан удаатай.

С.Сүлд