Удахгүй хуралдах Монголын Үндэсний Олимпийн хороо /МҮОХ/-ны ээлжит хурлаар тус хорооны удирдлагаа сонгоно. Энэ хүрээнд тус хорооны хараат бус, бие даасан сонгуулийн комисс өчигдөр хуралдаж, зарим шийдвэрийг гаргажээ. Ингэхдээ саналын эрхтэй гишүүдэд хандан хорооны удирдлагын сонгуульд нэр дэвшигчдийг зарласан юм.

Хараат бус, бие даасан сонгуулийн комиссоос зарласан нэрсийн тэргүүн Хөдөлмөрийн баатар Н.Түвшинбаяр багтжээ. Түүнийг Монголын Үндэсний Олимпийн хорооны ерөнхийлөгчид нэрийг нь дэвшүүлсэн нь энэ.

Харин Гавьяат дасгалжуулагч Ч.Наранбаатар, МҮОХ-ны ерөнхий нарийн бичгийн дарга асан Ж.Отгонцагаан нар болон Монголын Гар бөмбөгийн холбооны тэргүүн Ц.Бат-Энх, БТСХ-ны дарга асан Г.Пүрэв-очир нар нэрээ дэвшүүлжээ. Ингэснээр олимпийн аварга Н.Түвшинбаяр өрсөлдөгчгүйгээр тус хорооны ерөнхийлөгчөөр сонгогдох магадлал нь нэмэгдэж байна.

Түүнийн хамгийн хүчтэй өрсөлдөгчөөр тодроод байсан Монголын Үндэсний Олимпийн Хорооны тэргүүн дэд ерөнхийлөгч Б.Баттүшиг ОУОХ-ны 136 дугаар чуулганд оролцогсдын олонхийн саналаар ОУОХ-ны гишүүнээр сонгогдсон нь Н.Түвшинбаярт ийнхүү боломж олгосон бололтой.

Сонирхуулахад, МҮОХ-ны удирдлагын бүрэлдэхүүнийг энэ сарын 14-нд сонгох хуваарьтай. Монголын баг тамирчид хүн төрлөхтний эв нэгдлийн бэлгэ тэмдэг болсон зуны олимпод оролцож эхэлсэн цагаас хойш анхны аварга төрж, Төрийн дууллаа эгшиглүүлсэн өдөр нь наймдугаар сарын 14.

С.Сүлд