Засгийн газрын ээлжит хуралдаанаар өнөөдөр боллоо. Хуралдаанаар Монгол Улсын 2020 оны төсвийн тодотголыг хэлэлцэж, дэмжжээ. Уг асуудлаар УИХ дахь АН-ын бүлгээс шаардлага хүргүүлээд байсан юм. Харин Сангийн сайд Ч.Хүрэлбаатарын зүгээс төсөвт тодотгол хийх шаардлага үүссэн тухай мэдэгдсэн нь саяхан.

Засгийн газрын хуралдаанаас гарсан шийдвэрийн талаар тэрбээр "Коронавирусээс болж, дэлхийн эдийн засаг 5-6 хувиар унахаар байна. Эдийн засгийн чиглэлээр судалгаа хийдэг байгууллагууд дээрх дүнг танилцуулсан.

Эдийн засаг агшсан ч 2021 онд эдийн засаг 5-7 хувиар өснө гэдэг тооцоо гаргасан. Иймээс дэлхийн судалгааны байгууллагаас гаргасан дүнд үндэслэн Монгол Улсын эдийн засгийн төлөвийг Сангийн яам хийж, Засгийн газарт танилцууллаа.

Монгол Улсын төсөвт тодотгол хийх төслийг боловсруулахдаа хэд, хэдэн зарчим баримталж байна. Нэгд, аж ахуй нэгж, иргэдэд үзүүлж байгаа дэмжлэгийг үргэлжлүүлнэ. Хоёрт, эрүүл мэндийн салбарт хэрэгжүүлэх зардлыг нэмэгдүүлэх зарчим баримталсан. Гуравт, экспортын орлого голлож буурч байгаа тул нэмэгдүүлэх чиглэлээр тодорхой арга хэмжээ авна. Дөрөвт, хөрөнгө оруулалтын зардлыг бууруулахын тулд энэ жил гэрээ байгуулж амжаагүй, ажил нь эхлээгүй хөрөнгө оруулалтын ажлыг цуцлах, санхүүжүүлэх дүнг бууруулах зарчим баримтлана" гэлээ.

Мөн тэрбээр "Хүүхэд бүрт 100 мянган төгрөг олгодог арга хэмжээ энэ оны аравдугаар сарын 1-нд дуусах байсныг он дуустал үргэлжлүүлэхээр шийдвэрлэсэн. Нийгмийн халамжаас тэтгэмж авдаг хүмүүст олгож эхэлсэн 100 мянган төгрөгийн нэмэгдэл он дуустал үргэлжилнэ. Бага орлоготой иргэдэд олгодог хүнсний талоны нэмэгдлийг он дуустал үргэлжлүүлэн олгоно.

Нийгмийн даатгалын шимтгэлийг тэглэсэн зохицуулалт аравдугаар сарын 1-нээс дуусч байсныг ажил олгогч 5, даатгуулагч 5 хувь төлж байхаар зохицуулалт хийлээ. Ингэснээр дарамт 50-60 хувь буурна.

Жилийн борлуулалтын орлого нь 1 тэрбумаас дотогш ААНОАТ-ыг тэглэх арга хэмжээг он дуустал үргэлжлүүлнэ. Түрээсийн төлбөрөө хөнгөлж байгаа аж ахуйн нэгжийн түрээсийн орлогод ногдох татварыг тэглэнэ. Ингэснээр 25 мянган орчим бизнес эрхлэгчид хөнгөлөлт эдэлнэ. Хүүхдийн мөнгийг 100 мянган төгрөгөөр нэмэгдүүлэн он дуустал олгоход 322 тэрбум, НДШ-д хөнгөлөлт үзүүлэхэд 144 тэрбум шаардлагатай болсон, энэ бүхнийг шийдвэрлэсэн. ААНОАТ-ыг тэглэхэд 105 мянган аж ахуй нэгжид нөлөөлдөг гэсэн юм.

С.Сүлд