Ерөнхийлөгч Х.Баттулга орон тооны долоон зөвлөхтэй байв. Байв гэдэг нь тэрбээр захирамж гаргаж, Иргэний нийгэм, хүний эрхийн бодлогын зөвлөх Г.Уянга, Эрүүл мэнд, хүний хөгжил, нийгмийн бодлого, иргэний оролцооны зөвлөх Д.Үүрийнтуяа, Байгаль орчин, хот, хөдөөгийн хөгжлийн бодлого, агаарын бохирдлын зөвлөх Д.Пүрэвдаваа, Соёл, шашны бодлогын зөвлөх Ц.Хулан нарыг чөлөөлсөн юм. 

2020 оны УИХ-ын сонгуулийн өмнөхөн. Мөн П.Нүрзэд, А.Адъяасүрэн, Р.Булгамаа, О.Амгаланбаатар нарыг орон тооны бус зөвлөхөөс чөлөөлж байлаа.

Ерөнхийлөгчийн захирамжаар чөлөөлөгдсөн орон тооны болон орон тооны бус найман зөвлөх нь УИХ-ын сонгуульд нэр дэвшсэн хэрэг.

Ингэснээр Ерөнхийлөгч Х.Баттулга Т.Тэгшжаргал, Ц.Эрдэнэбат, Э.Мөнх-Очир гэсэн гуравхан зөвлөхтэй үлдэж байсан юм. Нэг үгээр, УИХ-ын ээлжит сонгуулиас үүдэж, Төрийн тэргүүн бараг ганцаараа үлдэж байв. Санаж байгаа бол Ерөнхийлөгчийн Тамгын газрын даргаар ажиллаж байсан З.Энхболд "Амиа бодмоор байна" хэмээгээд албан тушаалаасаа бууж, АН-ын дарга С.Эрдэнийн ахлах зөвлөхөөр очсон байдаг. 

Тэгвэл Ерөнхийлөгч Х.Баттулга захирамж гаргаж зөвлөхүүдийнхээ орон зайг эргэн нөхөж эхэллээ. Нэн түрүүнд тэрбээр УИХ-ын гишүүн асан, ШИНЭН-ын Төв зөвлөлийн дарга Л.Болдыг дэргэдээ авсан.

Араас нь Эрүүл мэндийн сайд асан С.Ламбааг томилсон. Харин энэ удаад УИХ-ын дэд дарга асан Я.Санжмятавыг Хөдөө аж ахуйн асуудал хариуцсан орон тооны зөвлөхөөр томилжээ. Я.Санжмятав нь өнгөрсөн сонгуулиар АН-ын ерөнхий менежерээр ажилласан билээ.

Түүний хувьд аймгийн Засаг дарга, УИХ-ын гишүүн, сайд, парламентын спикерийн орлогчоор ажиллаж байсан туршлагатай.

С.Сүлд