Энэ долоо хоногт Тээврийн цагдаагийн албаны Жижүүрийн шуурхай удирдлагын хэлтэс нийт 1052 дуудлага мэдээлэл хүлээн авснаас зам тээврийн ослын шинжтэй 723 дуудлага мэдээлэл бүртгэгджээ.        
Бүртгэгдсэн зам тээврийн ослын улмаас 15 хүн гэмтэж, орон нутагт 12 хүний амь нас хохирчээ.

Тодруулбал, энэ сарын 03-ны 18.20 цагийн орчим Дундговь аймгийн Адаацаг сум IV баг “Сэртэнгийн ар” гэх газар “сумын төвөөс баруун урагш 80 км”-т шороон замд T.Corolla Spacio маркийн автомашины жолооч жалга мөргөсний улмаас жолооч, зорчигч нарын 2 хүний амь нас хохирсон байна. Түүнчлэн энэ сарын 06-ны 19.00 цагийн орчимд Баян-Өлгий аймаг Ногоон нуур сум IX баг Цагаан нуур тосгон “Угтах хаалга” гэх газар /сумын төвөөс зүүн урагш 3км/-т асфальтан замд Т.Самry маркийн автомашин онхолдож  жолооч, зорчигч нарын 6 хүний амь нас хохирсон байна.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 97 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 12 хүнийг шүүхээр баривчилж хуулийн дагуу хариуцлага тооцсон байна. 

Иймд замын хөдөлгөөнд оролцогч та бүхэн замын хөдөлгөөний дүрмийн өөрт хамааралтай заалт, шаардлагыг сахин биелүүлж, явган зорчигч нь явган хүний гарц, гарамтай хэсгээр зам хөндлөн гарч хэвших, жолооч явган хүний гарцан дээр зам тавьж өгсөн тохиолдолд зорчих хэсэг дээр алгуурлалгүй, түргэн шуурхай зам хөндлөн гарах, мөн чихэвч зүүсэн үедээ зам хөндлөн гарахгүй байхад анхаарна уу.